Maana 102nan

Yesu ɲɛnama don

YALA i b’a dɔn muso ani cɛ fila ninnu ye jɔni ye wa? Nin muso tun bɛ Yesu teriw la. A tɔgɔ ye ko Magadala Mariyama. Fini jɛman bɛ cɛ minnu na, olu ye mɛlɛkɛw de ye. Mariyama bɛ ka sonin min kɔnɔna  lajɛ, o ye Yesu su dayɔrɔ ye. O bɛ wele ko kaburu. Nka, Yesu su tɛ yen. Jɔni dun y’a ta? An k’o lajɛ ɲɔgɔn fɛ.

Yesu salen kɔfɛ, sarakalasebagaw y’a fɔ Pilate ye ko: ‘Ka Yesu to ɲɛnamaya la, a y’a fɔ ko a ka saya tile sabanan, a bɛna lakunun. O la sa, mɔgɔw bila u ka taa kaburu kɔlɔsi. Ni o ma kɛ, a ka kalandenw bɛ se ka Yesu su sonyɛ, ka tila k’a fɔ ko a lakununna.’ Pilate y’a fɔ sarakalasebagaw ye k’u ka sɔrɔdasiw bila ka taa kaburu kɔlɔsi.

Nka, Yesu ka saya tile sabanan sɔgɔma joona fɛ, Jehova ka mɛlɛkɛ dɔ balala ka na. A ye kabakurun kolonkolon ka bɔ kaburu da la. Sɔrɔdasiw siranna fo u ma se ka bɔ u nɔ na. U sera tuma min na ka kaburu kɔnɔna lajɛ, u y’a ye ko Yesu su tɛ yen. O la sa, Sɔrɔdasi dɔw taara dugu kɔnɔ k’o fɔ sarakalasebagaw ye. I b’a dɔn o sarakalasebagajuguw ye min kɛ wa? U ye sɔrɔdasiw sara u ka nkalon tigɛ nin cogo la: Aw ‘k’a fɔ ko a ka kalandenw nana sufɛ, ka a su sonyɛ aw sunɔgɔra tuma min na.’

O waati kɔnɔna na, muso minnu tun ye Yesu ka mɔgɔ sɛbɛw ye, olu dɔw nana kaburu lajɛ. U kabakoyara kosɛbɛ ka kaburu lankolon ye. Nka, yɔrɔnin kelen ten, mɛlɛkɛ fila sinna ka na jɔ u ɲɛkɔrɔ. Fini jɛman pasi-pasi tun bɛ u kan na. O mɛlɛkɛw ye musow ɲininka ko: ‘Mun na aw bɛ ka Yesu ɲini yan yɔrɔ la? A lakununna. Aw ka aw teliya ka taa o fɔ a ka kalandenw ye.’ Musow y’u yɛrɛ di boli ma sa! Nka u ka boli la, cɛ dɔ ye u lajɔ sira kan. I b’a dɔn o tun ye joni ye wa? Yesu tun don! A ko: ‘Aw ka taa a lakali ne ka kalandenw ye.’

Musow taara a fɔ kalandenw ye tuma min na ko Yesu ɲɛnama don, ani ko olu ye Yesu ye, kalandenw ma da o la. Piɛrɛ ni Yuhana bolila o yɔrɔnin bɛɛ la ka taa kaburu la walisa olu yɛrɛ ka o ye u ɲɛ na, nka u taara a sɔrɔ ko kaburu lankolon don. Piɛrɛ ni Yuhana taara ka Magadala Mariyama to o yɔrɔ la. O tuma de la Magadala Mariyama ye kaburu kɔnɔna lajɛ kokura, ka mɛlɛkɛ fila sigilen ye yen.

I b’a dɔn mun ye Yesu su sɔrɔ wa? Ala de ye a su latunun. Yesu sara ni farikolo min ye, Ala ma a lakunun ni o farikolo kelen ye. Ala ye farikolo kura di a ma min ni mɛlɛkɛw ta ye kelen ye. Nka walisa k’a jira a ka cidenw na ko ale ɲɛnama don, Yesu bɛ se ka farikolo ta, mɔgɔ bɛ se ka min ye, i ko an bɛna a ye cogo min na kɔfɛ.

Matiyu 27:​62-66; 28:​1-15; Luka 24:​1-12; Yuhana 20:​1-12.