¿BE WISI we ome doagi geb massergan doamarmoga? We ome nuga María Magdalena, Jesús e aya. Geb massergan mor sibbusibbu yomaladdina, ángelmala. We neg bibbi be daggedi, yaba María addagnaid, Jesús oburgwilesgu aagi diglesa. ¡Auggine, emisgi Jesús bar wegi masuli! ¿Doa ses be binsae? Anmar daggoena.

Jesús burgwisad sorba, sacerdotemar Pilatoga sogmala: ‘Jesús dula gudiunni sogsaye, ibbaagi ede gannar durguoye. Degsoggu, Jesús digarmaid naggulegega be dulemar barmide. ¡Adi mer e sabbingan Jesús sedmalaga, geb sogmalaga gannar durgusye!’. Geb Pilato wemarga sogsasunna soldadomar barmidmarye.

Auggine, Jesús burgwisad sorba, ibbaagi waggudaradba Jehová ángel uggiagwar noniggi. Geb Jesús digarmaid dogedgi aggwa dummad siid, obabbarmasa. Soldadomar nue gwaggismala, geg bilumagge gwisgusmala. ¡Nabbis, yaba addaggarmargua, Jesús sadde daggarmala! Geb abar soldadomar neggweburse nadmala, geb sacerdotemarbo sunmagdabmala. ¿Be wisi we sacerdotemala, isgana gumar soggua, ibu imasmala? Soldadomar bennusmala gaggansamalaga. Geb emarga sogsamala: ‘Sogmalo, bemar gabmagua, e sabbingan Jesús sesmarye’.

Degiidgi, omegan Jesús e ayamarga gusmaladi, Jesús nabba dagnadmala. ¡Dagnonimargua, ber negollo soge! Geb uggiagwale, ángel warbo mor nue daggardaggar gaed yoi gwisgunonimala. Egisdemala: ‘¿Ibigala bemar weg Jesús amimala? Ar bad durgusad. Gwae e sabbinganga sognamalo’. Geb omegan abarmadmala. Auggine igarba dule wargwen emar abingunoniggi. ¡Daggargua, we dule, Jesús! Geb omeganga soge: ‘An sabbinganga sognamalo’.

Omegan, Jesús sabbinganga sogsamargua Jesús dula gudiye, degine, dagsamarye, we dulemar omegan iddosursaarmala. ¡Geb Pedro, Juan bogwa neguanse abarmadmala, auggine neguan ollosii dagdabmala! Wemar nadgua, María Magdalena dina sorba mellede. Geb aa gine yaba addaggali, geb ángel warbo dagsa.

¿Be wisi bia Jesús nade? Babdummad imasa Jesús e sana yogguedga. Igi Jesús dula unni san nigga gudigusa, bar Babdummad ayobi odulossuli. Babdummad, ángelmar yobi Jesús imasa, burbar gudiguega. Auggine e sabbingan wisgumalaga dula gudiye, Jesús sanar gusdae.