¿PÜTÜJAA aaʼu jaralii na wayuukana? Tü jietkat shia María Magdalena, naʼaleewain shia Jesús otta aapiee na kasuukana asheʼin. Analaasü María suluʼu tü woowirakat, ¡nnojoishi Jesús yala! ¿Jara alüʼüjaka nia? Wekirajaa sünain.

Ouktapa Jesús müshii na sacerdotekana nümüin Pilato: ‹Kataiwaʼaya noʼu Jesús asoʼiraainjatü naaʼin soʼu 3 kaʼi naashin. Püjüta surulaat süpüla neʼrajüin saaʼu tü woowirakat suulia naʼluwajüin nia na nikirajüinkana otta naküjüin sümüin wayuu süsoʼiraain naaʼin›. Nuluwataaka na surulaatkana.

3 kaʼi süchikijee ouktuin Jesús antüshi wattaʼa maalü wanee aapiee. Nüsünneʼeraka tü ipa shirousekat tü woowirakat. Ainkuusü maʼin naaʼin na surulaatkana. Neirakaapa suluʼu tü woowirakat nnojoishi neʼrüin Jesús. Noʼunaka eemüin na sacerdotekana. ¿Pütüjaa aaʼu tü naainjakat na sacerdotekana? Aapüshii nneerü namüin na surulaatkana süpüla naküjüin alawaa, namaka: ‹Jüküjüinjatü sümüin wayuu nuʼluwajünüin Jesús natuma na nikirajüinkana wanaa sümaa jutunkuin›.

Antüshii eemüin tü woowirakat wanee jieyuu naʼaleewainyuu Jesús. ¡Malujunaka shia napüla! Neʼraka piamashii aapiee jorottusü nasheʼin, namaka: ‹¿Jamüshi jüchajaaka Jesús yaaya? Asoʼiraaipa naaʼin. Jüküja süchiki namüin na nikirajüinkana›. Nawataaka na jieyuukana. Wanaaka Jesús namaa wopuluʼu, nümaka: ‹Juʼuna jüküja shia namüin na tekirajüinkana›.

Naküjapa na jieyuukana süsoʼiraain naaʼin Jesús nnojotsü nanoujeein shia na nikirajüinkana. ¡Nuwataaka Pedro otta Juan eemüin tü woowirakat, malujunaka shia napüla! Noʼunapa sünalaaka María Magdalena suluʼu tü woowirakat shiʼraka piamashii aapiee.

¿Pütüjaa aaʼu kasa alataka nümüin Jesús? Nnojoijaashi nutuma Maleiwa. Nnojoluichipa müin aka naaʼin wanee wayuu. Meʼrujuichipa nia nutuma maʼaka naaʼin na aapieekana. Wayuuyaashi Jesús süpüla niiʼiyatüin namüin na nikirajüinkana süsoʼiraain naaʼin.