Kukwe kira 102

Jesús tä nire

¿MERI bätä ni brare nibu ye nire gare mäi? Meri ye María Magdalena, ja ketamuko Jesukwe. Aune nitre tä dän ngwen te ye ángel. María tä nikren kämäkäte känti Jesús ngwaka mikani, ¡akwa Jesús ngwaka ñaka yete! ¿Nire nikani ngwena? Ani mike gare jai.

Jesús kämikani ye bitikäre, nitre sacerdote käkwe niebare Pilato ie: ‘Jesús nämä nire ye ngwane niara gaikröta köbömä ye bitikäre te nieba kwe. Yebätä, ni mikani kwe dobo ye ngübarebiti. ¡Ne erere nitre ja tötikaka ñaka raba niken ngwaka ngwena aune Jesús ganinkröta ñaka rabadre niere!’ Guardia juandre kwe Pilato niebare ietre.

Jesús kämikani ye bitikäre köbömä yete dekä, batibe ángel iti Jehovakwe namani. Jä mikani kämäkäbiti ye dianinkä kwe. Guardiatre nikaninkä krubäte yebätä namanintre kwekebe. ¡Mrä, nikrabare kämäkäte kwetre aune, Jesús ngwaka ñaka nämene yete! Guardia ruäre nikani jutate aune kukwe ye niebare kwetre nitre sacerdote ie. ¿Nitre sacerdote töi käme yekwe dre nuainbare gare mäi? Niaratre ngwian biani ietre ni ngökakäre. ‘Mun nämene kübani aune nitre ja tötikaka nikani ngwena munkwe nie,’ niebare kwetre ie.

Ye ngwane, meritre ja ketamuko Jesukwe nikani doboi tuinbiti. ¡Jesús ngwaka ñaka kwani dobote ietre! Batibe, ángel nibu dän trä ngitiekä te nämene yete. ‘¿Ñobätä munta Jesús känene nete?’ ngwanintari kwetre. ‘Niara ganinkröta. Mun nän bengwaire aune munkwe nie nitre ja tötikaka kwe ie.’ Niaratre nikani betekä. Akwa ji ngrabare ni iti käkwe ketaninbätä. ¡Ye Jesús! ‘Mun nän aune munkwe nie nitre nänkä tibe ie,’ niebare kwe.

Jesús nämene nire aune niaratre käkwe tuani niebare kwetre nitre ja tötikaka ie aune, ñaka namani ruin metre ietre. ¡Pedro bätä Juan nikani betekä doboiti, akwa ñaka kwani ietre! Niaratre nikaninta aune, María Magdalena namaninte köre. Ye ngwane nikrabare kwe nguse aune ángel nibu jutuabare ie.

¿Dre namani bare Jesús ngwaka yebätä gare mäi? Ngöbökwe dianinkä yete. Ngöbökwe ñaka Jesús ganinkröta ni kä nebätä ye erere. Ganinkröta kwe üaire angeletre ye erere. Akwa niara nämene nire mikakäre gare nitre ja tötikaka ie, ja mikani tuare kwe ietre ni kä nebätä ye erere.

Mateo 27:62-66; 28:1-15; Lucas 24:1-12; Juan 20:1-12.