ANI wankebʼ saʼ li eetalil? Li ixq aʼan li xMaria Magdalena, ramiiw li Jesus ut ebʼ li winq li saqebʼ rix, aʼanebʼ li xʼanjel li Yos. Li xMaria yook chi ilok saʼ li jul bʼarwiʼ kikʼeheʼk li Jesus naq kikamk. Abʼan li Jesus maaʼani chik aran! Qilaq ani kikʼamok re.

Ak kamenaq chik li Jesus naq ebʼ laj tij keʼxye re laj Pilato: ‹Naq yoʼyo li Jesus kixye naq tnumeʼq oxibʼ kutan re naq twakliiq wiʼ chik chi yoʼyo. Taqlahebʼ laj puubʼ chi xkʼaakʼalenkil, re naq ebʼ li xtzolom inkʼaʼ teʼrisi li Jesus ut teʼxye naq kiwakliik wiʼ chik chi yoʼyo›. Tojaʼ naq laj Pilato kixye rehebʼ laj tij naq teʼxtaqla ebʼ laj puubʼ chi xkʼaakʼalenkil li jul.

Saʼ li rox kutan, jun li xʼanjel li Jehobʼa kiwulak eqʼla saʼ li bʼekbʼil jul bʼarwiʼ kimuqeʼk li Jesus. Li anjel kirisi li pek li keʼxtzʼap wiʼ re li jul. Li bʼekbʼil jul aʼin, chanchan jun li ochoch pek. Ebʼ laj puubʼ, kʼajoʼ keʼxuwak naq keʼril ru li anjel! Naq keʼilok chisaʼ li jul, keʼxkʼe reetal naq maaʼani chik li Jesus. Joʼkan naq koleʼxye chaq rehebʼ laj tij ut naq ebʼ laj tij keʼrabʼi aʼin, keʼxtoj ebʼ laj puubʼ re naq teʼtikʼtiʼiq. Maaʼusebʼ xnaʼlebʼ laj tij, keʼxye rehebʼ laj puubʼ naq teʼxye aʼin: ‹Ebʼ li xtzolom keʼkʼamok re, naq yooko chi wark›.

Wiibʼ oxibʼ li ixq, ramiiw li Jesus, kohebʼ chi rilbʼal li jul. Kʼajoʼ naq keʼsach xchʼool, naq inkʼaʼ keʼxtaw li Jesus chisaʼ li jul! Naq li xMaria Magdalena kiril aʼin, xko saʼ aanil chi xyeebʼal re laj Pedro ut laj Juan. Naq xko li xMaria, wiibʼ li anjel lemtzʼunebʼ rix, kutamilebʼ chiruhebʼ li ixq ut keʼxye: ‹Kʼaʼut naq keʼxchalk chi xsikʼbʼal li Jesus? Li Jesus ak kiwakliik wiʼ chik chi yoʼyo, yemaq chaq rehebʼ li xtzolom›. Naq ebʼ li ixq kohebʼ saʼ aanil, ma nakaanaw ani kixaqabʼank rehebʼ? Aʼan li Jesus! Tojaʼ naq li Jesus kixye rehebʼ: ‹Yemaq chaq rehebʼ lintzolom naq xinwakliik wiʼ chik chi yoʼyo›.

Naq ebʼ li ixq keʼxye naq li Jesus yoʼyo, ebʼ li xtzolom inkʼaʼ keʼxpaabʼ. Joʼkan naq laj Pedro ut laj Juan kohebʼ saʼ aanil chi rilbʼal li Jesus saʼ jul, abʼan maakʼaʼ keʼxtaw! Naq laj Pedro ut laj Juan keʼelk chaq, li xMaria Magdalena kikanaak chi ilok saʼ rokebʼaal li muqlebʼaal. Tojaʼ naq wiibʼ li anjel keʼxkʼut ribʼ chiru.

Ma nakaanaw kʼaru kixkʼul li xtibʼel li Jesus? Li Yos kisachbʼesink re. Li Yos kiwaklesink re chi yoʼyo, abʼan inkʼaʼ chik kixwaklesi saʼ tibʼelej. Kixwaklesi saʼ musiqʼej joʼ li xyuʼamebʼ li anjel. Us ta li Jesus wank saʼ musiqʼej kiru xbʼaanunkil naq t-ileʼq xbʼaanebʼ li xtzolom.