NĨ ŨŨĨ mũtumia ũyũ na arũme aya erĩ nĩa? Mũtumia ũyũ nĩ Mariamu Mũmagidali, mũrata wa Jesu. Nao arũme aya mehumbĩte matonyo merũ nĩ araika. Karumu gaka kanini Mariamu acũthĩrĩirie nĩho handũ harĩa mwĩrĩ wa Jesu waigirũo akua. Nĩho mbĩrĩra. No kaĩ rĩu mwĩrĩ ndũrĩho-ĩ! Nũũ ũweheretie? Ta reke tuone.

Thutha wa Jesu gũkua-rĩ, athĩnjĩri-Ngai meerire Pilato ũũ: ‘Rĩrĩa Jesu aarĩ muoyo oigĩte atĩ nĩ angĩariũkirio thutha wa mĩthenya ĩtatũ. Kwoguo athana mbĩrĩra ĩikario. Nĩguo arutwo ake matikaiye mwĩrĩ macoke moige atĩ nĩ ariũkĩtio kuuma kũrĩ akuũ?’ Pilato akĩra athĩnjĩri-Ngai matũme thigari ikarangĩre mbĩrĩra.

No kĩroko tene mũthenya wa gatatũ thutha wa Jesu gũkua mũraika wa Jehova agĩũka orĩo. Akĩgaragaria ihiga rĩehute mbĩrĩra-inĩ. Thigari nĩ ciamakire mũno ũ atĩ ikĩremwo nĩ gũkinyũkia. Mũthia-inĩ, rĩrĩa marorire thĩinĩ wa mbĩrĩra-rĩ, kaĩ mwĩrĩ ndwarĩho-ĩ! Thigari imwe igĩthiĩ itũũra-inĩ kwĩra athĩnjĩri-Ngai. Nĩ ũũĩ ũrĩa athĩnjĩri-Ngai acio oru mekire? Mahakire thigari ihenanie. ‘Ugai atĩ arutwo ake marokire ũtukũ, tũkomete, na maraiya mwĩrĩ,’ ũguo nĩguo athĩnjĩri-Ngai merire thigari ciuge.

Kahinda o ro kau-rĩ, atumia amwe arata a Jesu magĩthiĩ mbĩrĩra-inĩ. Kaĩ matakĩmakire mũno makora mbĩrĩra ĩrĩ theri! O rĩo araika erĩ marĩ na nguo ya gũkenga mũno makĩmaumĩrĩra. Makĩmoria atĩrĩ, ‘Nĩkĩ kĩratũma mwethe Jesu haha? Nĩ ariũkĩtio. Thiĩi na ihenya mũkeere arutwo ake.’ Kaĩ atumia acio nĩ mateng’erire-ĩ! No me njĩra-inĩ mũndũ ũmwe akĩmarũgamia. Nĩ ũũĩ arĩ ũ? Na githĩ ti Jesu! Akĩmera atĩrĩ, ‘Thiĩi mũkeere arutwo akwa.’

Rĩrĩa atumia acio meerire arutwo atĩ Jesu arĩ muoyo na nĩ mamwonete, arutwo acio nĩ monire arĩ hinya gwĩtĩkia. Petero na Johana mahanyũkire marorete mbĩrĩra-inĩ makeyonere, no ĩndĩ mbĩrĩra yaarĩ theri! Hĩndĩ ĩrĩa Petero na Johana mainũkire, Mariamu Mũmagidali agĩtigũo thutha. Hĩndĩ ĩyo nĩ rĩo acũthĩrĩirie akĩona araika erĩ.

Nĩ ũũĩ ũrĩa gwatuĩkire he mwĩrĩ wa Jesu? Nĩ Ngai wa ũninire. Ngai ndariũkirie Jesu na mwĩrĩ ũrĩa aarĩ naguo wa nyama mbere ya gũkua. Aaheire Jesu mwĩrĩ wa kĩĩroho, ta wa araika arĩa me igũrũ matu-inĩ. No nĩguo onie arutwo ake atĩ e muoyo-rĩ, Jesu no ahote kwĩhumba mwĩrĩ ũrĩa ũngĩhota kũonwo nĩ andũ, ta ũrĩa tũkwĩruta.