ARNAQ una angutillu marluk uku kikkuusut nalunngiligit? Arnaq tassaavoq Maria Magdalene, Jesusip ikinngutaasa ilaat. Angutillu qaqortunik atisallit inngiliupput. Ineeraq arnap alakkagaa tassaavoq iliveq, Jesus toqummat timaata ilineqarfigisaa. Jesusilli timaa peqanngilaq! Kia tigugamiuk? Tusariassagit.

Jesusip toqunerata kingornagut palasit Pilatus oqarfigaat: ’Jesus inuugallarami oqarpoq ullut pingajussaanni makikkumaarluni. Iliveq paarsisoqartiguk. Taava timaa ajoqersugaasa tillikkiartorsinnaassanngilaat oqarlutillu toqusunit makissimanerarlugu!’ Taava Pilatusip palasit ilivermut sakkutuunik paarsisuleeqquai.

Ullaannguarli Jesusip toqunerata ulluisa pingajussaanni inngili Jehovamit takutippoq. Ujarak ilivermit assakartippaa. Sakkutuut ersinermit nukillaarput. Kiisamilu ilivermut qiviarsinnaalermata timi peerussimavoq! Sakkutuut ilaat illoqarfimmukarput palasillu pisimasumik oqaluttuullugit. Palasit ajortut qanoq iliornerat nalunngiliuk? Sakkutuut akilerlugit sallutippaat. ’Oqassaasi sinilersimallusi, ajoqersugaalu unnuakkut aggersimasut timaa tillillugu,’ palasit sakkutuunut oqarput.

Tamatuma nalaani arnat arlallit, Jesusip ikinngutai, aggerput. Iliveq inoqanngitsoq takullugu tupigusoqaat! Tassanngaannaq inngilit marluk qinngornillit takkupput. ’Sooq Jesus tamaani ujarpisiuk?’ aperipput. ’Makissimavoq. Aallarasuarlusi ajoqersugaanut oqaatigiartorsiuk.’ Aallarasuarpullu. Aqqutaanili angutip unitsippai. Kia? Jesusip! ’Ajoqersukkannut oqaatigiartorsiuk,’ oqarpoq.

Jesus uumasoq takusimagitsik arnat oqaluttuummatik ajoqersukkat upperisinnaanngingajappaat. Peter Johannesilu ilivermut arpapput takuniarlugu. Iliverli inoqanngilaq! Peter Johannesilu qimagummata, Maria Magdalene kisimi tassaniilerpoq. Taava iliveq alakkarpaa tassanilu inngilit marluk takullugit.

Jesusip timaa qanoq pineqarsimasoq nalunngiliuk? Guutip peersimavaa. Jesus makitikkamiuk Guutip timimik uinilimmik toqunermini timigisimasaanik timilinngilaa. Jesus timimik anersaap pianik timilerpaa, inngilit qilammiittut timaasa assingannik. Ajoqersukkanili uumanerminik takutikkumallugit Jesus timeqalersinnaasarpoq inuit takusinnaasaannik, soorlu takussagipput.