NANCHI wamuyuka awe mwanamukazhi ne banabalume babiji baji pa kikye kipikichala nyi? Awe mwanamukazhi ke Maliya wa ku Mangadala, mulunda nanji Yesu. Banabalume bavwala bivwalo bitoka ke bamalaika. Akye kibamba kya kicheche mubena kutala Maliya yo mpunzha mo bamubikile Yesu byo afwile. Itelwa amba kilende. Pano mubiji ufwamo! Ñanyi wamusendele? Twaya tumone.

Yesu byo afwile, bañanga bamwambijile Pilato amba: ‘Yesu byo akijinga mumi waambile’mba pa kupitapo moba asatu ukasangulwa. Onkao mambo mukambizhe’mba, kilende bekilame bulongo, kuchina’mba, baana banji ba bwanga bakamwangatamo, ne kwibabula bantu amba, wasangulwa mu bafu!’ Pilato waambijile bañanga amba batume bashilikale na kulama kilende.

Bino lukelo pa juba ja busatu kufuma pafwijile Yesu, malaika wa Yehoba waishile. Waalumwineko jibwe ku kilende. Bashilikale bazakamine bingi kya kuba’mba bakankelwe ne kwenda. Kyapeleleko, byo batajile mu kilende, bamwene kafwamo muntu! Bashilikale bamo bayile mu muzhi na kwambila bañanga. Nanchi wayuka byaubile boba bañanga batama nyi? Bapaine mali ku bashilikale kuba’mba babepe. Bano bañanga baambijile bashilikale amba: ‘Mukambe’mba, baana banji ba bwanga bajikwiya bufuku, ne kumwiba kasa twalaala.’

Aba banabakazhi balunda nanji Yesu nabo bayile ku kilende. Byo bafikile bakuminye bingi pa kutana ufwamo mu kilende! Nobe mu kukopa kwa jiso, kwibamwekejile bamalaika babiji mu bivwalo bitoka. Bano bamalaika baipwizhe’mba: ‘Mambo ka o mubena kumukebela Yesu kuno? Wasangulwa. Yainga lubilo, kebabulai baana banji ba bwanga.’ Bano banabakazhi bayile lubilo! Pano byo bayilenga mu jishinda muntu umo wibemikile. Nanchi wamuyuka uno muntu nyi? Wajinga Yesu! Wibambijile’mba: ‘Yainga kebabulai baana bami ba bwanga.’

Banabakazhi byo babujile baana ba bwanga ba kwa Yesu amba Yesu wasangulwa ne kumona bamumona, baana ba bwanga bakankelwe kwitaba. Petelo ne Yoano bayile lubilo ku kilende na kwimwena abo bene, bino bataine kuba’mba ufwamo mu kilende! Petelo ne Yoano byo bafumineko, Maliya wa ku Mangadala washajile konka ku kilende. Po po asumbijile mu kilende ne kumonamo bamalaika babiji.

Nanchi wayuka kyamwekele ku mubiji wa kwa Yesu nyi? Lesa ye walengejile’mba mubiji wanji azhimañane. Lesa kechi wamusangwile Yesu na mubiji wa bumuntu ye afwile nanji ne. Wamupele Yesu mubiji mupya wa bumupashi, byonka biji bamalaika ba mwiulu. Bino pa kuba’mba amweshe baana banji ba bwanga amba wasanguka, Yesu waikele na mubiji wakonsheshe kumona bantu, kwesakana na byo tukafunda kulutwe.