ASINA pa chuaa hoo a puaa ŋiɔɔŋaa sim haa wa? Meele Makdaliŋ cho chuaa hoo ni. Wana laalaŋ o Chiisu niŋndo o cho ni. Puaa ŋiɔɔŋaa cho haa o domala humbulaŋ niŋnda, kiilaa Mɛlɛkaa ni. Naa nda chɔ Chiisu wa Meele cho naa nuaa ni. A veelu ndu aa sɛi buuloo. Kɛ dialuŋ Chiisoŋ cho lɛ loŋ te. Kuɛɛ nda hivi yɛ muŋ? Ŋ nuaŋnuŋndɔ.

Mɛɛ Chiisu vi, mi wanaa soliaa salaa o Mɛlɛka lo kɔ dimul Paile aa: ‘Lɔɔ Chiisu wa yoomu wo, mbo dimi maa te o vi pɛ mi palɛi hiou iyaa, o cho miiŋgu yoomu. Lelaŋ, dimul waŋnda ma kɔ wa sɛiyo lehɔl yɔŋi buɛiyaa nduaa huŋ chua ndu ma dimi maa Chiisu miiŋgu yoomu.’ Okoŋ, mi Paile dimul nda le ma vem waŋnda le sɛiyo waa lehɔl.

O le pilɛ niŋ kpe, mi kiilanɔ Mɛlɛkaa huŋ faŋa pouwo o sɛiyo sondoo. Mi sioonde bii puaa chɔuwaa wa loŋ nda tau. Kpeŋaŋndo bɛɛ a nɔla le. O paale yaandɔleŋ choo idiiyo puŋ suɛi hei yɔŋnuŋ ni. Mɛɛ nda huŋ nua o sɛiyo niŋ, a chi dialuŋ Chiisoŋ te. Mi puaa chɔuwa apum kua chiee ma kɔ dimul wanaa soli salaa o Mɛlɛka lo wa. A sina pa nyɛ wanaa wɔɔŋnda haa dimul nda wo? Ma ke puaa chɔuwa nyɛsɔlaa le ma dimi choolaŋ aa: ‘Boondii naŋ wa o luaŋnde, mi buɛiyaa nduaa huŋ a nyumndaŋ ma chiimbuu dialuŋ ndɔŋ.’

Mɛɛ nyɔɔ viou kpɛɛ, mi waŋlaanduaa apum, a ndaa laalaŋ o Chiisu niŋnda huŋ naa ndaa chɔ Chiisu wa. Kɛ mi kɔndɔfillo bii nda kanifuule a komal sɛiyo fondo fuu. O foofo koŋ choo, mi kiilaa Mɛlɛkaa a ŋiɔɔŋ fula loŋ o domala humbulaŋ niŋ. Okoŋ ma nyuna nda aa: ‘Le yɛɛ nya cho yɛ Chiisu nuaa nanuŋ? Mɛlɛka soli ndu o sɛiyo niŋ. La kɔ chɔ chɔ mi la dimul buɛiyaa nduaa.’ Mi waŋlaanduaa haa nyaanuŋ chɔ chɔ. Kɛ mi po pum kei nda simi o nɛi. A sina wana wa koŋndo? Chiisu ni. Mbo dimul nda aa: ‘La kɔ dimul buɛiyaa niaa.’

Mɛɛ waŋlaanduaa haa kɔ dimul buɛiyaa Chiisuaa maa a che Chiisu yoomu, pɛ pɛ bɛɛ a laalaŋ te. Mi Pitɛ nda Chɔŋ nyaanuŋ naa nda chɔ Chiisu wa le mi ndapila che pɛɛŋ. Kɛ a komal sɛiyo fondo fuu. Mɛɛ Pitɛ nda Chɔŋ miiŋguŋ, mi Meele Makdaliŋ lo kɔɔli. Okoŋ mɛɛ o nua o sɛiyo niŋ, mbo cha maalikɛiya nda ŋiɔɔŋ.

A sina nyɛ yɔŋnuŋ a dialuŋ Chiisoŋ ndoŋ? Mɛlɛka tosa ni mi ŋ lo. O cho lɛ a dialuŋ Chiisu vi woŋ te Mɛlɛka miŋgi ndu yoomu le. Dialuŋ inyinayaŋ o ke ndu ni maa maalikɛiya o choo choo niŋ. Kɛ le mbo chɔm buɛiyaa nduaa maa o miiŋgu yoomu, mbo chua dialuŋ nda nɔla ma che ndu woŋ. Ŋ cho hunɔɔ pɛɛku a hei okɔɔ.