ပူ ၁၀၂
ယ့ၣ်ၡူးမူထီၣ်က့ၤလံ
ပိာ်မုၣ်အဝဲအံၤဒီး ပှၤခံဂၤအံၤန့ၣ် မ့ၢ်မတၤလဲၣ်သုသ့ၣ်ညါဧါ. ပိာ်မုၣ်အံၤ မ့ၢ်ယ့ၣ်ၡူးအတံၤသကိးမုၣ် မၤရံမၤကဒါလ့ၣ်လီၤ. ပှၤကူသိးတၢ်ဝါခံဂၤတခီ မ့ၢ်မူခိၣ်ကလူးတဖၣ်န့ၣ်လီၤ. ဒၢးအဆံးဖိ လၢမၤရံနုာ်လီၤကွၢ်ဝဲန့ၣ် မ့ၢ်ပှၤပာ်ယ့ၣ်ၡူးအစိၣ်အလီၢ် ဖဲအသံဝံၤန့ၣ်လီၤ. တၢ်လီၢ်အံၤ ဘၣ်တၢ်ကိးအီၤလၢတၢ်သွၣ်ခိၣ်န့ၣ်လီၤ. ဘၣ်ဆၣ်ဒီး ခဲအံၤ အစိၣ်တအိၣ်ဖဲအံၤလၢၤဘၣ်. မတၤစိာ်ကွံာ်အီၤလဲၣ်. ပကွၢ်သကိးတက့ၢ်.
ယ့ၣ်ၡူးသံဝံၤအလီၢ်ခံ ပှၤလုၢ်တၢ်အခိၣ်တဖၣ် တဲဘၣ်ဝဲပံၤလးဒ်အံၤ, ‘ဖဲယ့ၣ်ၡူးမူဒံးဝဲအခါန့ၣ် စံးဝဲဒၣ်လၢ သၢသီဝံၤအလီၢ်ခံ ကဂဲၤဆၢထၢၣ်သမူထီၣ်က့ၤဝဲလီၤ. တၢ်န့ၣ်အဃိ မၢလီၤပှၤကခိးတၢ်သွၣ်ခိၣ်န့ၣ်တက့ၢ်. မ့ၢ်မၤဒ်န့ၣ်ဒီး အပျဲၢ်တဖၣ်ဟဲဟုၣ်အစိၣ်ဒီး, စံးလၢ သံဝံၤဂဲၤဆၢထၢၣ်သမူထီၣ်က့ၤဝဲလံန့ၣ် တသ့ဘၣ်လီၤ.’ ပံၤလးတဲဘၣ်ပှၤလုၢ်တၢ်အခိၣ်တဖၣ်လၢ ကမၢလီၤသုးဖိတနီၤ လၢကခိးတၢ်သွၣ်ခိၣ်န့ၣ်လီၤ.
ဘၣ်ဆၣ်သနာ်က့, ဖဲယ့ၣ်ၡူးသံဝံၤ တုၤလၢသၢသီန့ၣ် ယဟိဝၤအမူခိၣ်ကလူးတဂၤ ဟဲတုၤဝဲသတူၢ်ကလာ် ဖဲမုၣ်ဆ့ၣ်ထီၣ်သီသီဒံးအခါန့ၣ်လီၤ. ဒီးတလ့ၢ်ကွံာ်ဝဲလၢၢ်ဖးဒိၣ်လၢ တၢ်ကျၢၢ်ဘၢဃာ် တၢ်သွၣ်ခိၣ်အပူၤန့ၣ်လီၤ. သုးဖိတဖၣ် ပျံၤတၢ်နးမးအဃိ ဟူးဝဲဝးဝဲသ့ၣ် တဘူၣ်နီတစဲးဘၣ်. လၢခံကတၢၢ် တုၤအကွၢ်နုာ်ဝဲသ့ၣ်ဆူ တၢ်သွၣ်ခိၣ်အပူၤအခါ တထံၣ်ဝဲပှၤအစိၣ်လၢၤဘၣ်. ပှၤသုးဖိတနီၤ လဲၤဆူဝ့ၢ်ပူၤဒီး တဲဘၣ်ပှၤလုၢ်တၢ်အခိၣ်တဖၣ်လၢ တၢ်ဂ့ၢ်အံၤန့ၣ်လီၤ. ပှၤလုၢ်တၢ်အခိၣ်လၢအအၢအသီတဖၣ် မၤမနုၤလဲၣ်န့ၣ် သုသ့ၣ်ညါဧါ. ဟ့ၣ်ပှၤသုးဖိတဖၣ်စ့ဒီး မၢအလီကတိၤတၢ်န့ၣ်လီၤ. မၢပှၤသုးဖိတဖၣ်တဲဝဲလၢ ‘ဖဲပမံသပ့ၤဘၣ်ပသးအခါန့ၣ် အပျဲၢ်တဖၣ် ဟဲဟုၣ်က့ၤဝဲလီၤ’.
ဖဲအကတီၢ်ဝဲန့ၣ် ယ့ၣ်ၡူးအတံၤသကိးမုၣ်တနီၤ ဟဲဆူတၢ်သွၣ်ခိၣ်န့ၣ်လီၤ. တထံၣ်လၢၤဘၣ်ပှၤအစိၣ်အဃိ ကမၢကမၣ်ဝဲသ့ၣ်လီၤ. ဖဲန့ၣ်အခါ မူခိၣ်ကလူးခံဂၤ လၢကူသိးဆ့ကပြုၢ်ကပြီၤ ဖျါထီၣ်ဝဲသတူၢ်ကလာ် ဒီးစံးဘၣ်အဝဲသ့ၣ်လၢ ‘ဘၣ်မနုၤသုဃုယ့ၣ်ၡူးဖဲအံၤန့ၣ်လဲၣ်. မူထီၣ်က့ၤဝဲလံ, လဲၤချ့ချ့ဒီးတဲဘၣ် အပျဲၢ်တဖၣ်တက့ၢ်.’ ပိာ်မုၣ်တဖၣ်အံၤ က့ၤဃ့ၣ်ဝဲ ချ့ဒိၣ်မးန့ၣ်လီၤ. သနာ်က့ လၢကျဲဖးဖီန့ၣ် ပှၤတဂၤ မၢအအိၣ်ကတီၢ်ဝဲန့ၣ်လီၤ. မ့ၢ်မတၤလဲၣ်န့ၣ်သုသ့ၣ်ညါဧါ. မ့ၢ်ဒၣ်ယ့ၣ်ၡူးလီၤ. ယ့ၣ်ၡူးစံးအဝဲသ့ၣ်လၢ ‘လဲၤတဲဘၣ်ယပျဲၢ်တဖၣ်တက့ၢ်’ န့ၣ်လီၤ.
ဖဲပိာ်မုၣ်တဖၣ်လဲၤတဲဘၣ် အပျဲၢ်တဖၣ်လၢ ယ့ၣ်ၡူးမူထီၣ်က့ၤဝဲလံ ဒီးအဝဲသ့ၣ်ထံၣ်ဘၣ်တ့ၢ်အီၤလံ အခါန့ၣ် ကီမးလၢအပျဲၢ်တဖၣ် ကနာ်ဝဲအဂီၢ်န့ၣ်လီၤ. ပ့းတရူးဒီးယိၤဟၣ်န့ၣ် အဲၣ်ဒိးထံၣ်ဘၣ်ဝဲလၢ အကစၢ်ဒၣ်ဝဲအဃိ လဲၤဃ့ၢ်ဝဲသ့ၣ်ဆူ တၢ်သွၣ်ခိၣ်ဘၣ်ဆၣ် ထံၣ်ဘၣ်ဝဲဒၣ် တၢ်သွၣ်ခိၣ်အိၣ်ဟိကလိၤန့ၣ်လီၤ. ပ့းတရူးဒီးယိၤဟၣ် ဟဲက့ၤထွးထီၣ်ဖဲတၢ်သွၣ်ခိၣ်အခါ မၤကဒါလ့ၣ်မၤရံတခီအိၣ်တ့ၢ်ဝဲဖဲန့ၣ်လီၤ. ဖဲအခါန့ၣ် ကွၢ်နုာ်ဝဲဆူတၢ်သွၣ်ခိၣ်ပူၤဒီး ထံၣ်ဘၣ်ဝဲမူခိၣ်ကလူး ခံဂၤန့ၣ်လီၤ.
ယ့ၣ်ၡူးအစိၣ်လဲၤတုၤဝဲဆူလဲၣ် နသ့ၣ်ညါဧါ. ယွၤမၤဟါမၢ်န့ၣ်လီၤ. ယွၤတမၤမူထီၣ်က့ၤယ့ၣ်ၡူး ဒ်အနီၢ်ခိ သွံၣ်ထံဖံးညၣ် လၢအသံတ့ၢ်ဝဲအသိးန့ၣ်ဘၣ်. ယွၤဟ့ၣ်ယ့ၣ်ၡူးအနီၢ်ကစၢ် ဒ်သိး မူခိၣ်ကလူးတဖၣ် အနီၢ်သး အနီၢ်ကစၢ်န့ၣ်လီၤ. ဘၣ်ဆၣ်, ယ့ၣ်ၡူးတခီ ဒ်သိးကပာ်ဖျါထီၣ်အဝဲအိၣ်မူဒံးဝဲ လၢအပျဲၢ်တဖၣ်အမဲာ်ညါအဂီၢ် ဟံးန့ၢ်ဝဲနီၢ်ခိလၢ ပှၤထံၣ်အီၤကသ့န့ၣ်လီၤ. တၢ်ဂ့ၢ်အံၤ ပကသ့ၣ်ညါဘၣ်အီၤ ခဲအံၤလီၤ.
