Esimwititi 102: Jesus muzuni
ONO diva asi yilye mukadi ogu novagara ava vavali? Mukadi kuna kara Mariya Mangadarena, mukwawo zaJesus. Ano vagara ava moyikoverero yoyizera vaengeli. Kanzugogona aka ana kutara Mariya kuna kara evango omu va tulire rutu rwaJesus apa ga fire. Ako kukatumbura asi ntoko. Nye ngesi rutu mutupu! Yilye ogu ana ru gusa mo? Tu tareni.
Konyima apa ga fire Jesus, vapristeli tava tantere Piratusa asi: ‘Jesus apa ga kere muzuni kwa tente asi ngava mu vhumbura konyima zomazuva gatatu. Gava nye mpangera asi ntoko va zi kunge. Yipo nye varongwa vendi va pire kuvaka rutu rwendi nokutanta asi vana mu vhumbura koufe!’ Piratusa ta tantere vapristeli va tume vakwayita nokukakunga ntoko.
Nye kongurangura mezuva lyautatu konyima zonomfa daJesus, muengeli gwaJehova ta wiza hararasi. Ta sindumuna ko kontoko emumanya. Vakwayita vana tukuka sili, kapi vana kuvhura kugenda. Mouhura, apa vana tara monda zontoko, rutu mutupu mo! Vakwayita vamwe tava zi mositata nokukatantera vapristeli. Ono diva asi yinke vana rugana vapristeli wovadona ava? Awo tava futu vakwayita yipo va kumbagere. Vapristeli tava tantere vakwayita asi: ‘Tanteni asi varongwa vendi vana wiza masiku, ose kuna rara, yiyo vana ya vaka mo rutu rwendi.’
Posiruwo oso, vakwawo vaJesus vamwe wovakadi tava ka dingura ntoko. Ee, ngapi tupu omu ya va tetwire yokuzigwana siporongwa! Hararasi tupu vaengeli vavali moyikoverero yokupaima tava moneka. Tava pura asi: ‘Yinke muna kuyapaparera Jesus oku? Vana mu vhumbura. Ka zeni usimbu mu ka tantere varongwa vendi.’ Ee, ngapi tupu omu vana kuduka vakadi ava! Nye monzira mugara gumwe ta va kondere. Ono diva asi yilye? Jesus! Ta tanta asi: ‘Ka zeni mu ka tantere varongwa vange.’
Vakadi apa vana ka tantera varongwa asi Jesus muzuni ntani awo vana mu mono, varongwa kapi vana hara kuyipura. Peturusa naJohanesa tava dukire kontoko va ka litarere ko nyamwawo, nye ntoko siporongwa! Peturusa naJohanesa eyi vana kukaza, Mariya Mangadarena ta kara poopo. Apa yipo nye ana tara monda nokumona vaengeli ava vavali.
Ono diva asi yinke ya horokerere rutu rwaJesus? Karunga kwa ru ninkire ru dongonoke. Karunga kapi ga vhumbwilire Jesus keparu morutu ropanyama omu ga fililire. Age kwa pere Jesus rutu rorupe ropampepo, ngaga va kara nago vaengeli meguru. Nye mokulikida varongwa vendi asi muzuni, Jesus ta ninki rutu oru nava vhura kumona vantu, ngomu natu ka lironga.
Mateusa 27:62-66; 28:1-15; Rukasa 24:1-12; Johanesa 20:1-12.
Mapuro
- Yilye ogu mukadi mefano, wolye owo vagara vavali, ntani kupi oku vana kara?
- Morwasinke ana tanterere Piratusa vapristeli mokutuma vakwayita mokukakunga ntoko zaJesus?
- Yinke ana rugana muengeli kongurangura mezuva lyautatu konyima zonomfa daJesus, nye yinke vana rugana vapristeli?
- Morwasinke vana tetukire vakadi vamwe apa vana ka dingura ntoko zaJesus?
- Morwasinke vana dukire oPeturusa naJohanesa kontoko zaJesus, ntani yinke vana ka gwana?
- Yinke ya horokerere rutu rwaJesus, nye yinke ana rugana mokulikida varongwa vendi asi age muzuni?
Mapuro gokugwederera ko
- Resa Mateusa 27:62-66 ntani 28:1-15.
Posiruwo sevhumbuko lyaJesus, ngapi omu vapristeli wovanene noVafalisayi ntani nomasimbi va zonenene mpepo zokupongoka?
- Resa Rukasa 24:1-12.
Sihorokwa sevhumbuko lyaJesus, ngapi omu asi likida asi Jehova kutara vakadi ngonombangi dokuhuguvara?
- Resa Johanesa 20:1-12.
Johanesa 20:8, 9, ngapi omu azi tu vatere tu mone hepero zokundindira nsene kapi tuna kukwata egano nawa esikiliromo lyouporofete woBibeli?
Kuvhura o hafere hena
RUHUNGU
Mulyo gonomfa nevhumbuko lyaJesus
Mausili ntazimwe gomoBibeli aga faturura omu nomfa domuntu gumwe da retera eparu wovanzi.
