Icisimicisyo 102: BaYesu Bali Abalabi
KANI ulimwisi uyu mwanakasi ne balalume abo babili? Umwanakasi ni Maliya Magadala, icibusa ca baYesu. Kabili ne balalume abafwite ifyakufwala ifitubile ni nkalamba. Aka kapinda kanini ako Maliya alukulengelamo mupunda umo icitumbi ca baYesu bacibikile panuma ili bafwile. Uletwa ati icilende. Pano icitumbi tacimo! Mba ninani uwacipintile? Leka tubone.
Panuma ili baYesu bafwa, abapapatilisi balabila kuli Pilati ati: ‘Ili Yesu aali acilaba alilabile ati akabuka pa kupite’nsiku sitatu. Popele komekeni ati icilende cilukulamwa. Eli abasambile bakwe tekuti bebe icitumbi cakwe kabili ne kulabila ati abuka pa bafwile!’ Pilati ababula abapapatilisi ukutuma ifita ukuya mu kulama icilende.
Pano lucelocelo pa kasuba ka busitatu panuma ili baYesu bafwile inkalamba ya baYehoba yapulililo’kwisa. Yaalamunako ibwe ku cilende. Ifita fyatina ukwakuti icakweba’ti tekuti fitele. Mukupelako, ili fyalengela mu cilende, icitumbi tacimo! Fimo fimo ifita fyaya mu musi ne kubabula abapapatilisi. Kani waisiba ifi abapapatilisi imbifi bacita? Bafilipila ifita ati fibepe. Abapapatilisi bafibula ifita ati: ‘Mulabile ati abasambile bakwe bacisa ubusiku, ili twali tucili mutulo, kabili ne kwiba icitumbi.’
Mu mpindi yenke’yi, bamo bamo abanakasi ifibusa fya baYesu baya ku cilende. Mame’fi bakankamana pa kucisangana icakubulamo neli fimo! Koti nififi inkalamba sibili mu fyakufwala ifitubile tuu syabwenekela. Syaipusya ati: ‘Mba nindo iyi mulukubafwaila baYesu muno? Babusiwa. Endesyeni kamuya ne kubulako abasambile babo.’ Mame’fi abanakasi babutuka! Pano pa nsila umwalalume abemakanika. Kani wamwisibo’yo? Ni baYesu! Balabila ati: ‘Kamuya mubabule abasambile banji.’
Ili abanakasi bababula abasambile ati baYesu bali abalabi kabili nekweba’ti baali bababona, abasambile bacisangana ukube’cikatesye ukucetekela. Petilo na Yoane babutukilako ku cilende mu kulibwena abene benka, pano mu cilende tamupo neli fimo! Ili Petilo na Yoane baya, Maliya Magadala asyalikisya kunuma. Ulo eli alengelamo ne kubona inkalamba sibili.
Kani waisiba ifyacitikile ku mubili wa baYesu? BaLesa baliulengele ukubulo’kuboneka. BaLesa tababusisyepo baYesu mu mubili wa munefu woyo bafwililemo. Balipele baYesu umubili wa bukumo uwa mupasi, koti ni woyo inkalamba sikwete kwiulu. Pano pakweba’ti balangisye abasambile babo ati balabi, baYesu bangafwala umubili uwakweba’ti abantu bangabona, koti nifyefyo twakusambilila.
Matayo 27:62-66; 28:1-15; Luku 24:1-12; Yoane 20:1-12.
Ifyakwipusya
- Kani umwanakasi uuli mu cikope ninani, mba abalalume bobilo nibani, kabili nipi bali?
- Mba nindo Pilati abulila abapapatilisi ati batume ifita ukuya mu kulama icilende ca baYesu?
- Mba findo inkalamba yacita lucelocelo pa kasuba ka busitatu panuma ili baYesu bafwile, pano findo abapapatilisi bacita?
- Mba nindo abanakasi bamo bamo bakankamanina ili baya ku cilende ca baYesu?
- Mba nindo Petilo na Yoane bailako ulubilo ku cilende ca baYesu, kabili findo basangana?
- Kani findo fyacitikile ku mubili wa baYesu, pano findo bacita pakweba’ti balilangisye ku basambile babo ati bali abalabi?
Ifyakwipusya na fimbi
- Pendeni Matayo 27:62-66 na 28:1-15.
Pa mpindi yakubuuka kwa baYesu, kani abapapatilisi abakulu, abaFalisi, ne bakulu baliubifisye syani umupasi uswetelele? (Mat. 12:24, 31, 32; 28:11-15)
- Pendeni Luku 24:1-12.
Kani icisimicisyo cakubuuka kwa baYesu cilalanga syani ukweba’ti baYehoba balabona abanakasi ati nimboni isicetekelwe? (Luku 24:4, 9, 10; Mat. 28:1-7)
- Pendeni Yoane 20:1-12.
Kani Yoane 20: 8, 9 alatofwa syani ukwisiba ati cintu icicindeme ukuba abatekenye kani tatumfwikisyepo umwalola ukufikilisiwapo kwa kusimika ukwa mu Baibolo? (Ifisi. 4:18; Mat. 17:22, 23; Luku 24:5-8; Yoa. 16:12)
