Chihande 102

Yesu Wamutonyi

OU PWEVO navava malunga vavali unavejiva tahi? Pwevo ikiye Maliya Mangatala, sepa lyaYesu. Kahava malunga vanavwale vitoma hivangelo. Muno mukapete anakushishika Maliya mukiko vafunjile Yesu omu afwile. Vavulukamo ngwavo muchimbumbe. Oloze mujimba wakwihimo! Iya aumbachilemo? Tutalenu kanawa.

Omu nafu Yesu, vapilishitu navamba kuli Pilatu ngwavo: ‘Yesu ambile shimbu apwanga wamutonyi ngwenyi omu namukahita makumbi atatu mwakasanguka. Shikaho valweze vakalame chimbumbe, kuchina tumbaji twenyi navakeza nakwiva mujimba wenyi nakwamba ngwavo nasanguka kuvafu!’ Pilatu mwalweza vapilishitu vatume maswalale vakalame kuchimbumbe.

Jino nachimenemene halikumbi lyamuchitatu kufuma hakufwa chaYesu, kangelo kaYehova himweza. Hikulishindumunako lize lilolwa kuchimbumbe. Maswalale muzuzu wavakwate, kuhasa kutambuka chiku. Hakutala jino muchimbumbe, mujimba pimbi! Maswalale vamwe hikuya kwimbo nakulweza vapilishitu. Unejiva vinavalinga ava vapilishitu vavapi? Hikufweta maswalale mangana vambulule makuli. Vapilishitu navalweza maswalale ngwavo: ‘Ambululenu ngwenu tumbaji twenyi vezanga naufuku, nakumwivamo shimbu twapwangetu mutulo.’

Halwola kana, masepa jaYesu vamwe vamapwevo hinaveza kuchimbumbe. Ocho kulikomokela kana hakuwana mwapimbi! Kukasumuka tungelo vavali vanavwale mahina atoma to hivanasoloka. Navahula ngwavo: ‘Mwomwo ika munakumutondela Yesu kuno? Vanamusangula lyehi. Yenu lumbushi mukavambulile tumbaji twenyi.’ Olwo lumbushi kana vanalupuka! Oloze lunga umwe himwavemika hajila. Unamwijiva tahi? Ikiye Yesu! Ngwenyi: ‘Yenu mukavalweze tumbaji twami.’

Mapwevo hakuvalweza tumbaji ngwavo vanamumono Yesu wamutonyi, tumbaji kavate kwitavila. Petulu naYowano hikulahila kuchimbumbe vakalimwene, chili vene kuwana muchimbumbe mwapimbi! Omu vanafumuko vaPetulu naYowano, Maliya Mangatala nasale. Hakiko hano anakunonokamo nakumona jino vangelo vavali.

Unejiva muvaulingile mujimba waYesu tahi? Kalunga ikiye auswekele. Kalunga kamusangwile Yesu mumujimba wanyama uze afwile nawoko. Amuhanyine Yesu mujimba wauhya wakushipilitu, ngana wavangelo vamwilu. Oloze hakusaka kulweza tumbaji twenyi ngwenyi nasanguka, Yesu himwalyalumuna mumujimba uze vanahase vatu kumona, nge munatulilongesa.

Mateu 27:62-66; 28:1-15; Luka 24:1-12; Yowano 20:1-12.