¿Á XÍNI̱ÚN ndáa ñaʼá kúú ñá va̱xi nu̱ú na̱ʼná yóʼo? Ñá María Magdalena kúúñá, ñáyóʼo kúú miga ta̱ Jesús. ¿Ndáana kúú u̱vi̱ ta̱a na̱ ndíxi ti̱ko̱to̱ yaa va̱xi yóʼo? Na̱ ángel kúúna. Ñá María xítoñá ini ya̱vi̱ nu̱ú sa̱ndúxu̱nna ta̱ Jesús, soo kǒokara ndíka̱a̱. ¿Ndáana nda̱kiʼin-ñaʼá ku̱a̱ʼa̱n xíʼinna? Ná kotoyó.

Tándi̱ʼi ni̱xi̱ʼi̱ ta̱ Jesús, na̱ su̱tu̱ ni̱xa̱ʼa̱nna ni̱ka̱ʼa̱nna xíʼin ta̱ Pilato, ta káchina: ʼTá tákuka ta̱ Jesús ni̱ka̱ʼa̱nra tá ná kuvira ti̱xin u̱ni̱ ki̱vi̱ ndatakura káchira. Va̱ʼaka chindaʼá na̱ soldado ná ku̱ʼu̱nna kundaana nu̱ú sa̱ndúxu̱nnara. Ña̱kán va̱ása kuchiñu na̱ discípulo ndakiʼinnara ku̱ʼu̱n xíʼinna, tasaá ka̱ʼa̱nna nda̱takuvaraʼ. Ta̱ Pilato xa̱ʼndara chiñu ña̱ ná ku̱ʼu̱n na̱ soldado kundaana.

Tá sa̱kán ni̱tu̱vi ña̱ ki̱vi̱ u̱ni̱ ña̱ ni̱xi̱ʼi̱ ta̱ Jesús, iin ángel kama ki̱xa̱a̱ra sa̱kútaʼara yu̱u̱ ña̱ ndási yu̱ʼu̱ ya̱vi̱. Na̱ soldado ni̱yi̱ʼvíkavína ni kǒo níkivi ka̱nda̱na. Tándi̱ʼi ku̱u ña̱yóʼo, saá xi̱tona ini ya̱vi̱, ta̱ Jesús kǒokara ndíka̱a̱. Sava na̱ soldado ni̱xa̱ʼa̱nna nu̱ú na̱ su̱tu̱ ta na̱túʼunna xíʼinna ndiʼi ña̱ ku̱u yóʼo. ¿Á xíni̱ún ndáaña ke̱ʼé na̱ su̱tu̱ ndi̱va̱ʼa-ini yóʼo? Cha̱ʼvina na̱ soldado ña̱ ka̱ʼa̱nna tu̱ʼun vatá. Ta káchina xíʼinna: ʼKa̱ʼa̱nndó, tá kísi̱ndó saá ki̱xi na̱ discípulora ta nda̱kiʼinnara ku̱a̱ʼa̱n xíʼinnaʼ.

Tá xi̱ta̱a̱n ki̱vi̱ saá, ki̱xa̱a̱ ná miga ta̱ Jesús ña̱ kotoná nu̱ú ni̱ndu̱xu̱nra. Soo kǒokara ndíka̱a̱. Na̱ ángel na̱ yéʼe̱ ti̱ko̱to̱va ñúʼu. Ta ni̱nda̱ka̱tu̱ʼunna náyóʼo: ʼ¿Ndachun nándukúndó ta̱ Jesús yóʼo? Xa̱nda̱takuvara, kuaʼánndó ta natúʼunndó xíʼin na̱ discípuloraʼ. Tasaá xínuná ku̱a̱ʼa̱nná. Soo chí yichi̱ nda̱kutáʼanná xíʼin iin ta̱a. Ta̱ Jesús kúúra, ta káchira xíʼinná: ʼKuaʼánndó nu̱ú na̱ discípuloi̱ ta natúʼunndó xíʼinnaʼ.

Tá na̱túʼun ná si̱ʼí yóʼo xíʼin na̱ discípulo xa̱ʼa ña̱ nda̱taku ta̱ Jesús ta xi̱ninára yichi̱, na̱ discípulo kǒo níkandíxana náyóʼo. Ta̱ Pedro xíʼin ta̱ Juan xínuna ku̱a̱ʼa̱nna nu̱ú ni̱ndu̱xu̱n ta̱ Jesús, soo kǒokara ndíka̱a̱. Tá ke̱ena ku̱a̱ʼa̱nna, ñá María Magdalena ni̱ndo̱ovañá. Tasaá xi̱toñá ini ya̱vi̱ ta xi̱niñá u̱vi̱ na̱ ángel.

¿Á xíni̱ún ndáaña ndo̱ʼo ku̱ñu ta̱ Jesús? Ña̱ sa̱ndáñúʼuva Ndióxi̱ kúúña. Tá nda̱takura i̱xaa Ndióxi̱ kǒo níxi̱yokara táki̱ʼva ni̱xi̱yora tá xi̱takura. Na̱samavara, táki̱ʼva káa iin na̱ ángel saá ndu̱ura. Soo ña̱ va̱ʼa kuni na̱ discípulo ta̱yóʼo ña̱ tákura, ndu̱ura iin na̱ yiví ña̱ va̱ʼa kuninara.