UA TANTEKEYA veya ava vamala vavali na uze mpuevo, ni? Uze mpuevo ua pua kavusamba ka Yesu, lizina lieni Maliya Mandalena. Kaha ava vamala va li mu vuzalo vua ku toka va pua tungelo. Omu mu kahondo mua li na ku tala Maliya, mukuemuo mu va hakele muvila ua Yesu mua tsile. Va ka luka nguavo cihilo. Vunoni muvila ua Yesu ua himo! Iya na u ambatamo? Tu ci mu tantekeye.

Mua tsile Yesu, vasasendote va lekele Pilato nguavo: ‘Yesu mua kele na muono ua handekele ngueni a ka sanguka mu nima ya matangua atatu. Ngeci mukemuo tuma vantu va ka niunge cihilo ceni. Linga vandongesi veni kati va punde muvila ueni kaha va handeke nguavo na sanguka ku vatsi!’ Pilato ua lekele vasasendote va tume masualale linga va niunge ku cihilo.

Vunoni ha litangua lia mu citatu fume ha kutsa ca Yesu, ku cimene kuezile kangelo ua Yehova. Ua langumuine livue ku mbelo ya cihilo masualale va tsile cintsima. Kaha mu va talele mu kati ka cihilo muvila ua himo! Vamo va ku masualale va ile mu mbonge na ku leka vasasendote. Ua tantekeya vika va lingile ava vasasendote va ku pihia, ni? Va fuetele vaze masualale linga va ka handeke makuli, nguavo: ‘Mu ka handeka nguenu, vandongesi veni vezile mu ku punda muvila tele tuli mu tulo’.

Vamo va vusamba va Yesu va vampuevo va ile mu ku tala ku cihilo, va komokele mu ku ciuana ca mupulungua! Haze vene kua solokele tungelo vavali. Kaha va va hulile nguavo: ‘Vika mu li na ku tondela Yesu kuno? Na sanguka laza. Hamenu mu ka leke vandongesi veni’. Ngeci vampuevo va tuntile cikuma! Vunoni mu njila, umo yala ua vemikile. Ua mu tantekeya, ni? Ikeye Yesu! Ua va leka ngueni: Hamenu mu ka leke vandongesi vange.’

Omo vampuevo va ka lekele vandongesi nguavo Yesu na sanguka kaha va mu muene na meso avo, vandongesi ka va tavele. Petulu na Yoano va tuntilile ku cihilo linga va ka limuene, vunoni va ci uanene ca mupulungua! Omo Petulu na Yoano va fumineko, Maliya Mandalena ua salele ku nima. Hakeho ha talelemo na ku mona tungelo vavali.

Ua tantekeya vika via lingikile ku muvila ua Yesu, ni? Njambi ua lingisile muvila ua Yesu ku zimangana. Njambi ka sanguile Yesu na uze muvila ua ntsitu ua tsile nauo. Ua mu hele muvila ua uha ua sipilitu, ngue ize i va kala nayo tungelo muilu. Vunoni linga a muese ku vandongesi veni ngueni a li na muono, Yesu ua hasele ku zala muvila uze u va hasa ku mona vantu, ngue mu tu ka lilongesa.