Historia 102

Jesús yoltika

¿TIKMATSTIKA akinon siuatl niman akinomej yejuin omemej tlakamej? Yejuin siuatl, itoka María Magdalena, se inomachtijkauj Jesús. Niman tlakamej akin intlaken istak, yejuamej iluikaktekitkej. María ontlachixtika ijtik teostotl kampa okitlalijkaj itlalnakayo Jesús, san ika, ¡xok nesi! ¿Akinon okitkik? Matikitakan.

Sakin ijkuak Jesús yomik, teopixkej kijliaj Pilato: ‘Ijkuak Jesús yoltoya okijtoka ika ijkuak yopanok yeyi tonajli, yejua yoliuiskia. Ika yejon, xtlanauati makitlajpiyakan teostotl. ¡Ijkon inomachtijkauan xuelis kichtekiskej itlalnakayo niman kijtoskej ika oyoliuj!’ Pilato kimijlia makintitlanikan soldados.

Ijkuak yopanok yeyi tonajli ika yokimiktijkaj Jesús, se iiluikaktekitkauj Jehová noteititia ika kualkan. Kejkuania tetl tlen ika tentsaujtoya teostotl. Pampa soldados melak nomojtiaj xtlaj uelij kichiuaj. ¡Sakin, ijkuak ontlachiaj ijtik teostotl itlalnakayo Jesús xok nesi! Kuakon sekimej soldados yauej ipan ueyi kalpan niman kimijliaj teopixkej. ¿Tikmatstika tlen kichiuaj teopixkej xkuakualtin? Kintlaxtlauiliaj niman ijkon maka makijtokan tlen melauak. ‘Xteijlikan ika inomachtijkauan okitkikej ijkuak nenkochiyaj’, kimijliaj.

Ijkuak yejon panotika, sekimej siuamej akin inomachtijkauan Jesús, yauej kampa teostotl. ¡Xtlaj kitaj! Imixpan nesij, omemej iluikaktekitkej ika intlaken petlantika. ‘¿Tleka nenkitejtemouaj Jesús nikan?’, tetlajtoltiaj. ‘Yejua oyoliuj. Xuiyan niman xkimijlitij inomachtijkauan.’ Yejuamej notlalouaj. San ika, ipan ojtli kinteltia se tlakatl. ¡Yejua Jesús! ‘Xuiyan niman xkimijlikan nomachtijkauan’, kijtoua.

Ijkuak siuamej kimijliaj inomachtijkauan Jesús ika yoltika niman ika yokitakej, yejuamej xkinneltokaj. ¡Pedro niman Juan yauej kampa onka teostotl, san ika, xtlaj kinextiaj ijtik! Ijkuak yejuamej yauej, María Magdalena nokaua tlakuitlapan. Kuakon, ontlachia ijtik teostotl niman kimita omemej iluikaktekitkej.

¿Tikmatstika tlenon opanok ika itlalnakayo Jesús? ToTajtsin okichiuj mapopoliui. ToTajtsin xokiyoliti Jesús ika itlalnakayo tlen kipiaya. Okiyoliti kentla espíritu, ijkon ken iluikaktekitkej. Pampa Jesús kineki makimatikan inomachtijkauan ika yoltika, kichiua makitakan.

Mateo 27:​62-​66; 28:​1-​15; Lucas 24:​1-​12; Juan 20:​1-​12.