UTYII olie omukai ou novalume ava vevali? Omukai o Maliya Madalena, epanga lia Yesu. Ovalume vokuna ovikutu vituela onoandyu. Mokandyuo aka Maliya ekahi nokutala, omo ankho muapakwa otyivimbi tya Yesu. Katiwa elangalo. Mahi pahe olutu kalumo. Olie welupolamo? Tutalei.

Etyi Yesu ankhia, ono saserdote mbapopila Pilatu okuti: ‘Yesu etyi ankho ena omuenyo, watile mononthiki ononthatu matutila. Moluotyo, tuma ovanthu vakayunge elangalo. Opo ovalongwa vae vahavakemo otyivimbi tyae iya avati watutila.’ Pilatu atolela ono saserdote vatumeko omafualali opo vakayunge elangalo.

Anthi kombimba, monthiki ya tatu tunde etyi Yesu ankhia, peya liwa liwa oandyu ya Yehova. Aipolopo emanya pelangalo. Omafualali aakala nouoma omunene avehetyivili okulinyenga. Etyi vakatala melangalo, otyivimbi katyimo. Omafualali amue aende mepundaumbo pala okukatolela ono saserdote. Utyii oityi ono saserdote ombo onondingavivi mbalinga? Vafeta omafualali opo vakembe. Ono saserdote mbatolela omafualali okuti: ‘Popiei okuti ovalongwa vae veile ounthiki, puetyi ankho tulele iya avavakepo otyivimbi.’

Ovakai vamue, omapanga a Yesu vaya okukatala melangalo. Etyi vehika, avahuvu mokonda melangalo ankho mutupu natyike. Liwa liwa pamoneka onoandyu onombali mbuna ovikutu viliaima. Ambupulu okuti: ‘Omokonda yatyi mukahi nokutaindyila Yesu apa? Oe, watutilale. Endei nkholo katolelei ovalongwa vae.’ Ovakai avaende nokuhateka. Anthi omulume umue evetalameka mondyila. Utyii olie? O Yesu. Evetolela okuti: ‘Endei katolelei ovalongwa vange.’

Etyi ovakai vatolela ovalongwa okuti Yesu una omuenyo vemumona, ovalongwa kavatavelele. Petulu na João avakahatekela kelangalo opo vekelitaleleko ovo muene. Mahi etyi vehika, melangalo ankho mutupu natyike. Etyi Petulu na João vapita, Maliya Madalena esala konyima. Etyi atala melangalo wamona onoandyu onombali.

Utyii oityi tyapita nolutu lwa Yesu? Huku welukotesa. Huku katutilisile Yesu nolutu luna ankhia nalo. Waavela Yesu olutu lumue olupe luopaspilitu, luelifwa nolwo noandyu keulu. Anthi opo alekese kovalongwa vae okuti una omuenyo, Yesu ankho ulipilulula molutu lumue ovanthu vapondola okutala, ngetyi matukelilongesa.