Ekitebyo 102

Yesu Ahuriire

NOOMANYA ogu mukazi hamwe n’aba bashaija babiri? Omukazi ni Mariamu Magadaleene, munywani wa Yesu. Kandi abashaija abajwaire ebijwaro birikwera ni baamaraika. Akashengye kakye aka aku Mariamu arikuringurizamu n’omwanya ogu baatairemu omutumbi gwa Yesu bwanyima y’okufa. Nigwetwa ekituuro. Kwonka hati omutumbi tigurimu! N’oha owaagutwaire? Ka tureebe.

Bwanyima y’okufa kwa Yesu, abanyamurwa bagambira Pilaato bati: ‘Obu Yesu yaabaire akihuriire, akagira ngu naija kuzooka bwanyima y’ebiro bishatu. N’ahabw’ekyo ragiira barinde gye ekituuro. Haza abeegi be tibarabaase kwiba omutumbi gwe ngu bagire ngu azookire kuruga omu bafu!’ Pilaato agambira abanyamurwa okwohereza abaserikare kurinda ekituuro.

Kwonka omu kasheeshesheeshe aha kiro kya kashatu Yesu aherize kufa, maraika wa Yehova ahonaaho aija. Akumbagaza eibaare kuruga aha muryango gw’ekituuro. Abaserikare batiina munonga baremwa n’okugyenda. Aha muheru, ku baringuriza omunda omu kituuro, omutumbi gukaba gutarimu! Bamwe aha baserikare bagyenda omu rurembo kandi bagambira abanyamurwa. Noomanya eki abanyamurwa aba ababi baakozire? Bakaha aba baserikare enguzi ngu babeihe. Abanyamurwa bagambira abaserikare bati: ‘Mugire ngu abeegi be baizire nyekiro obu tubaire tubyami, baiba omutumbi gwe baagutwara.’

Omu kaanya ako, bamwe aha bakazi banywani ba Yesu baija aha kituuro. Ka baatangaire okushanga ekituuro kirimu busha! Ahonaaho baamaraika babiri bajwaire emyenda erikwengyengyeta bareebeka. Babuuza bati: ‘Ahabw’enki nimurondera Yesu aha? Azookire. Mwehuute mugambire abeegi be.’ Mbwenu abakazi ka bairukire! Kwonka omu muhanda omushaija abeemereza. Noomanya owaabemereize? Ni Yesu! Abagira ati: ‘Mwirooko mugambire abeegi bangye.’

Abakazi ku bagambira abeegi ngu Yesu ahuriire kandi ngu baamureeba, abeegi kibagumira kwikiriza. Petero na Yohaana bairuka baza aha kituuro okwereebera, kwonka bashanga ekituuro kirimu busha! Petero na Yohaana ku barugaho, Mariamu Magadaleene agumaho. Obwo nibwo yaaringuriizemu kandi akareeba baamaraika bari babiri.

Noomanya ekyabaire aha mutumbi gwa Yesu? Ruhanga akagubuzaho. Ruhanga tarazoire Yesu omu mubiri gw’obuntu ogu yaafiire nagwo. Akaheereza Yesu omubiri musya ogw’omwoyo, nk’ogu baamaraika omu iguru baine. Kwonka okubaasa kworeka abeegi be ngu ahuriire, Yesu naataho omubiri ogu abantu barikubaasa kureeba, nk’oku turaije kwega.

Matayo 27:62-66; 28:1-15; Luka 24:1-12; Yohaana 20:1-12.