UN’DZIWA mbani mkaziyu na amuna awiriwa? Mkaziyu ni Mariya Madalena, xamwali wa Jezu. Ndipo amuna wa bzakubvala bzicenawa, ni wanjo. Ka cipinda kang’ono komwe Mariya ankukanyang’anisaka, ni mbuto yomwe mukhadaikhidwa thupi la Jezu pomwe iye adafa. Kambacemeredwa nthutu. Tsono thupilo mulibe! Mbani walitenga? Mbatiwone.

 Pomwe Jezu adafa, wansembe wadati kwa Pirato: ‘Pomwe Jezu akhana moyo, iye adalewa kuti angadadzamuka zitapita nsiku zitatu. Ikhani walindiri pa nthutupo. Tenepo anyakupfunza wace wangadzabe lini mtembo waceyo, waciti iye walamusidwa kwa anyakufa!’ Pirato adauza wansembewo kuti watumize wacikunda kuti wakalindire nthutuyo.

Tsono ku macibese-bese kwa nsiku yacitatu ya kufa kwa Jezu, adabwera anjo wa Yahova mwadzidzidzi. Iye adacosa cimwala cakufungira nthutuyo. Wacikundawo wadabva mantha mwakuti wadandoima ningati wafumbidwa. Pakumalizira, pomwe iwo wadadzanyang’anisa mkati mwa nthutuyo, mtembo ule ukhadanyembereka! Wacikunda winango wadayenda ku mzinda, wacikauza wansembe wale. Un’dziwa n’ciani wadacita wansembe wakuipawo? Iwo wadalipira wacikundawo kuti waname. Wansembewo wadati kwa wacikundawo: ‘Lewani kuti pomwe mukhagona usiku, anyakupfunza wace wadabwera, wacidzaba mtemboyo.’

Mkati mwa bzimwebzi, akazi winango womwe wakhali axamwali wa Jezu, wadayenda kukawona nthutuyo. Iwo wadadabwa kwene-kwene pakuiwona yakusaya cinthu! Mwadzidzidzi, wadawonekera wanjo awiri na bzakubvala bzakuyetima. Iwo wadati: ‘Thangwe ranyi munkunyang’ana Jezu muno? Iye walamusidwa. Ndokoni mwakanfulumize mukadziwise anyakupfunza wace.’ Akaziwo wadathamanga liwiro ladzawoneni! Tsono munthu m’bodzi adawaimisa mu njiramo. Un’dziwa akhali mbani? Akhali Jezu! Iye adati: ‘Ndokoni mukawadziwise anyakupfunza wangu.’

Pomwe akaziwo wadadziwisa anyakupfunzawo kuti Jezu akhana moyo na kuti wakhadamuwona, iwo wadaneseka kukhulupira. Pedru na Juwau wadathamangira ku nthutuko kuti wakabziwonere wokha, tsono wadakawona nthutuyo iribe cinthu! Pomwe Pedru na Juwau wadacoka, Mariya Madalena adasala. Pamwepo ni pomwe iye adanyang’anisa mkatimo, aciwona wanjo awiri wale.

Un’dziwa n’ciani cidacitika na thupi la Jezu? Mulungu adalinyemberesa. Mulungu alibe kulamusa Jezu ku moyo na thupi la nyama lomwe adafa nalo. Iye adapasa Jezu thupi linango la uzimu, ninga la wanjo wa kudzulu. Tsono kuti awonese anyakupfunza wace kuti akhana moyo, Jezuyo akhakwanisa kukhala na thupi lomwe wanthu wangadamuwone, ninga momwe tin’pfunzira kutsogoloku.