ASOO ɛze raalɛ ne nee mrenya nwiɔ ne menli holɛ? Raalɛ ne a le Mɛle Magdalene, mɔɔ le Gyisɛse agɔnwo la. Na mrenya nwiɔ ne mɔɔ wula adɛladeɛ nwohyee ne la le anwumabɔvolɛma. Sua ekyi ɛhye mɔɔ Mɛle ɛlɛnea nuhua la a le ɛleka mɔɔ bɛziele Gyisɛse wɔ mekɛ mɔɔ ɔwule la. Bɛfɛlɛ ye nla. Noko kɛkala funli ne ɛnle nu! Nwane a vale a? Maa yɛnlea.

Gyisɛse wule la, ɛsɔfo ne mɔ zele Paelɛte kɛ: ‘Mekɛ mɔɔ Gyisɛse de aze la ɔhanle kɛ saa ɔwu a ye kenle nsa ne azo bɛbadwazo ye bara ngoane nu. Yemɔti maa adenle maa bɛzinza nla ne. Amaa ye ɛdoavolɛma ne angɔnwua ye na bɛaraha bɛahile menli kɛ bɛdwazo ye bɛvi ewule nu!’ Paelɛte hanle hilele ɛsɔfo ne mɔ kɛ bɛzoa sogyama bɛmaa bɛhɔzinza nla ne.

Noko Gyisɛse wule la kenle ne mɔɔ tɔ zolɛ nsa la aleɛbahye ne Gyihova anwumabɔvolɛ rale arɛlevilɛ nu. Ɔhondole bolɛ ne ɔvile nla ne anloa. Ɛzulolɛ kpole hanle sogyama ne mɔɔ bɛangola bɛandu bɛ bo a. Awieleɛ kolaa mɔɔ bɛnleanle nla ne anu la, ɛnee funli ne ɛnla nu! Sogyama ne bie mɔ hɔle sua zo hɔhanle hilele ɛsɔfo ne mɔ. Ɛze mɔɔ ɛsɔfo atisesebɛ ne mɔ yɛle a? Bɛmanle sogyama ne ezukoa kɛ bɛbɔ adalɛ. Ɛsɔfo ne mɔ hanle hilele sogyama ne kɛ: ‘Bɛha ye kɛ, nɔe ne mɔɔ ɛnee yɛlafe la yɛɛ ye ɛdoavolɛma ne rawuale ye funli ne a.’

Wɔ zɛhae mekɛ ne anu, mraalɛ bie mɔɔ bɛ gɔnwo a le Gyisɛse la hɔle nla ne azo. Nea kɛzi ɔzinle bɛ nwo kɛ bɛannwu ɛhwee wɔ nuhua a! Arɛlevilɛ nu ala anwumabɔvolɛma nwiɔ mɔɔ wula adɛladeɛ nwohyee la vindele bɛ nwo ɛkɛ ne. Bɛbizale kɛ: ‘Duzu ati a bɛlɛkpondɛ Gyisɛse wɔ ɛke a? Bɛdwazo ye. Bɛmaa ɔyɛ ndɛ bɛhɔze ye ɛdoavolɛma ne.’ Nea kɛzi mraalɛ ne mɔ vale ɛnriandilɛ hɔle ndɛndɛ a! Noko mɔɔ bɛlua adenle ne azo la nrenya bie manle bɛgyinlanle. Ɛze ahenle holɛ ko ɔ? Gyisɛse ɔ! Ɔzele bɛ kɛ: ‘Bɛhɔha bɛhile me ɛdoavolɛma ne.’

Mekɛ mɔɔ mraalɛ ne mɔ hanle hilele ɛdoavolɛma ne kɛ Gyisɛse de aze na bɛnwu ye la, ɛdoavolɛma ne anlie ɛhye anli. Pita nee Dwɔn nriandile hɔle nla ne azo kɛ bɛdabɛ bɛkanlea, noko bɛannwu ɛhwee wɔ nla ne anu! Mekɛ mɔɔ Pita nee Dwɔn hɔle sua nu la, Mɛle Magdalene angɔ. Mekɛ zɔhane anu a ɔnwunle anwumabɔvolɛma nwiɔ ne wɔ nla ne anu la.

Asoo ɛze ɛleka mɔɔ Gyisɛse sonlabaka ne hale a? Nyamenle manle ɔminliminlinle. Nyamenle anva Gyisɛse sonlabaka ne mɔɔ ɔvale ɔwule la andwazo ye. Ɔmanle Gyisɛse sunsum nu sonlabaka fofolɛ, kɛmɔ anwumabɔvolɛma mɔɔ wɔ anwuma la ɛdeɛ ne de la. Noko amaa ye ɛdoavolɛma ne anwu kɛ ɔde aze la, Gyisɛse ɛnee kola fa sonlabaka mɔɔ menli kola nwu ye la di gyima, kɛmɔ yɛbanwu ye la.