¿GI PÄDI toꞌo nuni ꞌme̱hñä ꞌne nuyu̱ yoho yä ñꞌo̱ho̱? Nuni ꞌme̱hñä rä thuhu Märia Magdalena, nꞌa rä ntsitsꞌi rä Hesu. ꞌNe nuyu̱ yä ñꞌo̱ho̱ xä ñhee de gä tꞌaxi, nuyu̱ yä e̱nxe̱. Märia handi pa mboo habu̱ xki ntꞌagi rä Hesu, ¡pe rä ndoyꞌo rä Hesu ya xki mꞌe̱di! ¿Toꞌo bi hñätsꞌi? Ma gä handihu̱.

Mꞌe̱fa de bi du rä Hesu, yä majhä bi ꞌñembäbi Pilato: “Änte de xä du rä Hesu bi ꞌñenä ge rä hñupa ma xä nuhu de rä du. Hänge pe̱hni toꞌo dä su habu̱ bä ntꞌagi pa njabu̱ nuꞌu̱ yä apostol hindä bepäbi rä ndoyꞌo ꞌne hindä ꞌñenä ge rä Hesu bi nuhu de rä du”. Hänge Pilato bi ꞌñembi nuꞌu̱ yä majhä ge xä me̱hni yä soldado.

Pe mi thogi hñupa de nuꞌmu̱ xki du rä Hesu, ngu bi hyatsꞌi, nse̱kitho bi nheki nꞌa rä e̱nxe̱ Jeoba. Näꞌä e̱nxe̱ bi hñäki näꞌä do mi kotꞌi rä ntꞌagi rä Hesu. Nuꞌu̱ yä soldado mi su näꞌä ntꞌagi xa bi ntsu, bi gotho bi mꞌai, ꞌne mi hyandi pa mboo, ¡ya xki mꞌe̱di rä ndoyꞌo rä Hesu! Rꞌa de nuꞌu̱ yä soldado bi ma pa ha rä hnini ꞌne bi xipi nuꞌu̱ yä majhä näꞌä xki thogi. ¿Gi pädi te bi me̱fi nuꞌu̱ yä tsꞌomꞌu̱i majhä? Bi guꞌti nuꞌu̱ yä soldado pa himbi mää näꞌä xki thogi ꞌne bi ꞌñembi: “Mäñhu̱ ge nuꞌu̱ yä de̱ni bi gu̱ki rä ndoyꞌo rä Hesu mientra ngi ähähu̱”.

Mientra mi thogi njabu̱, rꞌa yä ꞌme̱hñä mi yä ntsitsꞌi rä Hesu bi ma bä handi habu̱ xpi ntꞌagi rä Hesu, ¡pe bi dini xki huitꞌätho! Nse̱kitho bi nheki yoho yä e̱nxe̱ xa mi hue̱xki yä dutu ꞌne bi ñꞌani: “¿Por hanja gi honihu̱ua rä Hesu? Näꞌä ya bi nuhu. Nguntꞌä ri maha ꞌne guä xipäbihu̱ nuꞌu̱ yä apostol”. Nuꞌu̱ yä ꞌme̱hñä bi nextꞌi bi ma, pe ha ꞌñuu bi nthe̱ui nꞌa ñꞌo̱ho̱. ¿Gi pädi toꞌoꞌä? ¡Mi geꞌä rä Hesu! Rä Hesu bi ꞌñembäbiꞌu̱: “Ri maha ꞌne guä xipäbihu̱ nuꞌu̱ mä de̱ni”.

Nuꞌu̱ yä ꞌme̱hñä bi xipäbi nuꞌu̱ yä apostol ge rä Hesu ya xki nuhu de rä du, pe nuꞌu̱ himi tsa dä gamfri. Hänge Pedro ꞌne Juan bi nextꞌi bi ma pa ha xki ntꞌagi rä Hesu, ¡pe bi dini mi huitꞌätho! Pedro ꞌne Juan bi ma de gehni, pe Märia Magdalena ja bi gohni ꞌne mi hyandi pa mboo, ¡bi hyandi yoho yä e̱nxe̱!

¿Gi pädi te bi thogi ko rä ndoyꞌo rä Hesu? Äjuä bi japi bi mꞌe̱di. Äjuä himbi gu̱tsꞌi rä Hesu de rä du ko näꞌä rä ndoyꞌo mi pe̱ꞌtsi änte de xä du. Äjuä bi gu̱tsꞌi rä Hesu ko nꞌa rä ndoyꞌo de gä e̱nxe̱. Pe rä Hesu bi ñꞌudi ko nꞌa rä ndoyꞌo de gä jäꞌi pa njabu̱ nuꞌu̱ yä de̱ni bi za bi hyandi ge mi te.