¿LA AWETAʼM jachin laʼ ri ixoq xuqujeʼ e jachin täq ri kebʼ achijabʼ e kʼo pa ri wachbʼäl? Ri ixoq are María Magdalena, rachiʼl ri Jesús. Ri täq achijabʼ e saq katzʼyaq e ángeles. María tijan kril chupam ri jul jachiʼ xyaʼ wi ri ubʼaqil ri Jesús, ¡tekʼuriʼ kʼo ta chi ri ubʼaqil chilaʼ! ¿Jachin laʼ xukʼam bʼik? Chqilampeʼ.

Chiʼ kamnäq chi ri Jesús, ri täq ajkojol tabʼal toqʼobʼ xkebʼij che ri Pilato: ‹Chiʼ ri Jesús majaʼ na kkamik xubʼij che kkʼastaj pa oxibʼ qʼij. Rumal laʼ xkebʼij che rajawaxik kchajex ri jul. ¡Rukʼ wariʼ ri täq rajtijoxel kekun täj kkelqʼaj bʼi ri ubʼaqil rech kkebʼij che xkʼastajik!› Pilato xubʼij chike che kketaq bʼi ajchajanel.

Chiʼ xsaqarik che urox qʼij che ri ukamikal ri Jesús, jun ángel rech Jehová xukʼut ribʼ. Xresaj ri abʼaj kʼo che uchiʼ ri jul. Ri täq ajchajanel sibʼalaj xkexibʼij kibʼ rumal laʼ xeselebʼ ta chik. ¡Tekʼuriʼ, chiʼ xkil chupam ri jul, ri ubʼaqil ri Jesús kʼo ta chi chilaʼ! Jujun chike ri täq ajchajanel xeʼok bʼi pa ri tinamit tekʼuriʼ xkebʼij chike ri ajkojol tabʼal toqʼobʼ su xkilo. ¿La awetaʼm su xkebʼan ri täq itzel täq ajkojol tabʼal toqʼobʼ? Xketoj ri täq ajchajanel rech kkebʼij ta ri qastzij. ‹Chibʼij che are täq rajtijoxel xkekʼam bʼi ri Jesús chiʼ ix tijan kixwarik›, xechaʼ.

Tekʼuriʼ, nikʼaj ixoqibʼ e rachiʼl ri Jesús xebʼe che rilik ri jul. ¡Xkilo che kʼot nijun chupam! Tekʼuriʼ, kebʼ ángeles kqopowik, o karepkʼun ri katzʼyaq e kʼo chilaʼ. ‹¿Suche tijan kitzukuj ri Jesús waral?› Xechaʼ. ‹Ri Jesús xkʼastajik. Jix chanim chibʼij chike ri täq rajtijoxel›. Wa täq ixoqibʼ xebʼe chanim. Tekʼuriʼ chiʼ e kʼo pa bʼe jun achi xeʼuqʼatij. ¡Are ri Jesús! ‹Jix chibʼij chike ri täq wajtijoxel›, xchaʼ Jesús.

Chiʼ ri täq ixoqibʼ xkebʼij chike ri täq ajtijoxel che Jesús kʼaslik xuqujeʼ xkil uwäch, ri täq ajtijoxel kʼäx xkeriq che ukojik wa täq tzij riʼ. ¡Pedro xuqujeʼ ri Juan xebʼe chanim che rilik ri jul, tekʼuriʼ pa ri jul kʼot nijun! Chiʼ xebʼek, María Magdalena xkanaj kan chikij. Xkaʼy chupam ri jul tekʼuriʼ xril ri kebʼ ángeles.

¿La awetaʼm su xuriq ri ubʼaqil ri Jesús? Ri Ajawaxel xusach uwäch. Ri Ajawaxel xuwalasaj ta ri Jesús rukʼ ri ubʼaqil kʼo ojer. Xuya jun kʼakʼ ukʼaslemal xa junam kukʼ ke ri täq ángeles. Tekʼuriʼ rech kukʼut chike ri täq ajtijoxel che kʼaslik, ri Jesús xkunik xukʼut ribʼ pa jun bʼaqil che ri winaq xekunik xkilo.