¿YACHANKICHU pitaq chay warmiqa chaynataq chay iskay qarikunapas? Chay warmiqa Magdala llaqtayoq Mariam, payqa Jesuspa reqsisqanmi. Yuraq pachayoq runakunañataqmi angelkuna. Jesuspa cuerponta churasqanku sepultura ukutam Mariaqa qawachkan, ichaqa chaypichuqaya. ¿Pitaq apakururqa? Qawasunchikyá.

Jesuspa wañusqanmanta paqarinnintintam sacerdotekunaqa Pilatota nirqaku: ‘Jesusqa kawsachkasparaqmi nirqa kimsa punchawmanta kawsariramunanta. Chaynaqa kamachiyá sepulturata cuidanankupaq. ¡Chaynapimá discipulonkuna cuerponta mana suwakunqakuchu nitaq kawsarirunmi nispa ninqakuchu!’, nispa. Hinaptinmi Pilatoqa soldadokunata kachanankupaq nirqa.

Jesuspa wañusqanmanta kimsa kaq punchaw tutapaytam, Jehová Diospa angelnin qonqaymanta rikuriramurqa. Hinaspa sepulturapa punkunpi rumita suchurirachirqa. Chaymi soldadokunaqa mancharikuspanku wañusqa hinaña rikurirurqaku. ¡Chaymantam sepulturapa ukunta qawaykuspanku Jesuspa cuerponta manaña tarirqakuchu! Hinaspanmi wakin soldadokunaqa llaqtaman rispanku sacerdotekunaman willarurqaku. ¿Yachankichu imatam chay mana allin sacerdotekuna rurarqaku? Paykunaqa soldadokunamanmi qollqeta pagarurqaku llullakuspanku kaynata ninankupaq: ‘Puñuchkaptiykum, discipulonkuna Jesuspa cuerponta suwarusqaku’, nispa.

Chaymantam Jesuspa reqsisqan warmikuna sepulturaman rirqaku. ¡Hinaspa qawaykuptinku mana imayoq kachkasqa! Chaymi kancharichkaq pachayoq iskay angelkuna rikuriykuspa nirqaku: ‘¿Imanasqataq Jesustaqa maskachkankichik? Payqa kawsarirunmi. Utqaymanyá nimuychik discipulonkunaman’, nispa. Chaymi kallpastin pasakurqaku. Richkaptinkum huk runa harkarurqa. ¡Jesusmá kasqa! Paymi nirqa: ‘Wawqeykunamanyá willamuychik’, nispa.

Jesuspa kawsariramusqanta hinaspa qawaykusqankumanta chay warmikunapa willakusqankutam discipulonkunaqa cuentopaq hapispanku mana creerqakuchu. Hinaptinmi Pedrowan Juanqa sepulturaman kallparqaku, ichaqa manam imatapas tarirqakuchu. Paykuna pasakuptinku Magdala llaqtayoq Mariañataq waqastin qeparurqa. Hinaspam sepulturapa ukunta qawaykurqa chaypim iskay angelkunata rikururqa.

¿Yachankichu imataq pasarurqa Jesuspa cuerponta? Diosmi chinkarachirqa. Diosqa kawsarirachirqa manam ñawpa aycha cuerponpichu. Angelkunapa hina espiritu cuerpoyoqtañam Jesustaqa kawsarichirqa. Kawsariramusqanta qawachikunanpaqmi ichaqa rikuy atina cuerpopim discipulonkunaman rikurirqa.