LÁ NATAYÁÁ tsáa nindxu̱u̱ a̱ʼgu̱ bugi̱ ga̱jma̱a̱ tsíin nindxu̱ún nájmi̱i̱n xa̱bekha ráʼ. A̱ʼgu̱ bugi̱ nindxu̱u̱ María Magdalena, bi̱ nambáxu̱u̱ májánʼ ga̱jma̱a̱ Jesús. Xa̱bekha bi̱ kugíiʼ xtíin miʼxá nindxu̱ún ángeles. María xtáa rayexi náa awúun iñaʼ náa nijnguáan Jesús, ¡mú xúgi̱ ní nda̱wa̱a̱ ikhí! Tsáa ni̱jkha̱ kayáa xá. Guʼyáá.

Nda̱wa̱á rí nikháñu Jesús, ndxajkun nitháán Pilato: ‹Nákha̱ Jesús xtáa ndaʼya niʼthí rí matuxi̱i̱ ajtsú mbiʼi nda̱wa̱á rí nikháñu. Ikha jngó, naʼthí rí magun gúñewa̱a̱n iñáʼ náa nijnguáan Jesús. ¡Xúʼko̱ discípulos ndrígóo xándoo gúní kuʼwáʼ Jesús ga̱jma̱a̱ xándoo muthi rí nituxi̱i̱!›. Pilato naʼthúún rí muxuʼmiin soldados.

Mú ajtsú mbiʼi nda̱wa̱á rí nikháñu Jesús, mbá nacháá ni̱ʼkha̱ mbáa ángel ndrígóo Jeobá. Nayengaa itsí dí kúgoo ga̱jma̱a̱ iñaʼ. Soldados namiñun wéñuʼ rí asndu na̱nguá eñún gaguanu mijngii. ¡Nda̱wa̱á índo̱ nuyexi náa awúun iñaʼ, Jesús ní nda̱wa̱a̱ ikhí! Tikhun soldados natu̱ʼu̱u̱n náa xuajin ga̱jma̱a̱ nutún ndxajkun. Lá natayáá ndiéjunʼ eni ndxajkun bi̱ ra̱májánʼ a̱jkiún ráʼ. Nuni numún mu muninduwaʼ. Nutún: Guta rí discípulos ndrígóo nigún kuya̱a̱ nákha ikháanʼ kuwáanʼ runuʼ.

Mú tikhuun gu̱ʼu̱ bi̱ nambáxuu májánʼ gajmíi̱n Jesús nagún guyáá náa iñaʼ. ¡Nduyáá rí nda̱wa̱á nimbáa náa iñaʼ! Mbá nacháá ajmíi̱n ángeles nikujmiin ikhí, ángeles bugi̱ kugíiʼ xtíin rí nambiʼi wéñuʼ. Ikhiin nuraxi: ‹Náa numuu rí nduyáaʼ Jesús gi̱i̱ rá. Ikhaa nituxi̱i̱. Guʼguala nacha̱ ga̱jma̱a̱ gutun discípulos›. Ikhú gu̱ʼu̱ bugi̱ nagún ragañun. Mú náa kamba̱a̱ mbáa xa̱biya̱ naʼthúún rí muwajun. ¡Xa̱biya̱ bugi̱ ñajunʼ Jesús! Ikhaa naʼthí: ‹Guʼguala ga̱jma̱a̱ guthu̱u̱n discípulos ndrígóʼ›.

Índo̱ gu̱ʼu̱ nutún discípulos rí Jesús xtáa ndaʼya ga̱jma̱a̱ rí ikhiin ndiyáá, discípulos ndrígóo naʼniún mingíjyúu munimbu̱ún. ¡Pedro ga̱jma̱a̱ Juan nagún ragañun náa iñaʼ rí nijnguáan Jesús, mu náa iñaʼ nda̱wa̱á nimbáa! Índo̱ ikhiin nagún, María Magdalena naguanú tsudií. Ikhú ikhaa nayexi náa awúun iñaʼ ga̱jma̱a̱ ndaʼñún a̱jmi̱i̱n ángeles.

Lá natayáá ndiéjunʼ nigíʼnuu Jesús ráʼ. Dios niʼni rí ní xákujmaa. Dios nánguá nikuxi̱i̱ Jesús xóo xa̱bu̱ bi̱ ninindxu̱u̱ nákha ginii. Niʼni rí manindxu̱u̱ xóo mbáa espíritu, xóo má ángeles. Mu masngájma náa discípulos ndrígóo rí ikhaa ndaʼya, Jesús nasngájmaminaʼ xóo mbáa xa̱bu̱.