102-нҗи хекая

Иса дири

БУ АЯЛ билен ики адамың кимдигини билйәңми? Бу аял Исаның досты Магдалалы Меръем. Ак эшикли адамлар болса перишделер. Меръем Исаның өлүси гойлан отага середйәр. Бу отага мазар дийилйәр. Эмма ол ерде Исаның өлүси ёк! Оны ким алдыка? Гел, билели.

Иса өленде руханылар Пилатуса шейле дийдилер: «Иса дирикә, өзүниң үч гүнден дирелҗегини айдыпды. Шонуң үчин мазары горамагы табшыр. Шонда шәгиртлери өлүсини огурлап, халка: «Ол дирелди!» дийип билмез». Муны диңләп, Пилатус руханылара мазары горамак үчин эсгер ибермеги буюряр.

Исаның өленине үч гүн геченде, даң билен бирденкә Ехованың перишдеси пейда боляр. Ол мазарың агзындакы дашы бир чете тогалаяр. Эсгерлер горкудан яңа дуран еринде доңуп галярлар. Олар мазарың ичине серетселер, Исаның өлүси ёк! Кәбир эсгерлер болан затлары руханылара гүррүң бермәге шәхере гидйәр. Эрбет руханылар нәме эдендир өйдйәң? Руханылар эсгерлере пул берип: «Шәгиртлери гиҗе гелип, биз ятыркак, онуң өлүсини огурлапдырлар» дийип, ялан сөзлемеги табшырярлар.

Шол вагт мазарың янына Исаның достларындан кәбир аяллар гелйәр. Олар бош мазары гөрүп, хайран галярлар. Бирденкә, ак эшикли ики перишде пейда боляр. Олар аяллара: «Сиз нәме үчин Исаны бу ерден гөзлейәңиз? Ол дирелди. Гидиң-де, шәгиртлере айдың» диййәрлер. Аяллар ылгашып гидйәрлер. Бирденкә олары ёлда бир адам саклаяр. Онуң кимдигини билйәңми? Ол Иса! Иса олара: «Гидиң-де, муны шәгиртлериме айдың» диййәр.

Аяллар Исаның дирелендигини ве оны гөрендиклерини шәгиртлере айдяр. Олар ынанмаяр. Шонуң үчин Петрус билен Яхя өз гөзи билен гөрмек үчин мазара тарап ылгаяр. Гөрселер, мазар бош! Петрус билен Яхя ызына гайдяр, Магдалалы Меръем болса шол ерде галяр. Ол эглип, мазарың ичине середенде ики перишдәни гөрйәр.

Исаның өлүси ниредекә? Худай онуң өлүсини айырды. Худай Исаны өлен тенинде дирелтмеди. Ол Иса гөкдәки перишделериңки ялы рухы тен берди. Иса өзүниң дирилигини гөркезмек үчин шәгиртлерине ынсан тенинде гөрүнди.

Матта 27:62—66; 28:1—15; Лука 24:1—12; Яхя 20:1—12.