Makani 102: Jesu Wabuka
HENA ulimuzyi mukaintu ooyu abantu aaba bobilo? Mukaintu ooyu ngu Maliya Magadala imweenzyinyina a Jesu. Bantu ibasamide zisani zituba mbangelo. Oomu mucuumbwe Maliya mwalanga, alimwi mbobusena Jesu mbwaakazikkilwa naakafwa. Pele lino mubili tuuko. Ino ngwani waubweza? Atubone.
Afwe Jesu, bapaizi bakati kuli Pilato: ‘Jesu kacipona wakaamba kuti uya kubusyigwa kwaakwiinda mazuba otatwe. Aboobo babikka bantu balindila acuumbwe. Ikutegwa basikwiiya bakwe batakakonzyi kuubweza mubili akutalika kwaamba kuti wakabuka.’ Pilato waambila bapaizi kutumya basikalumamba kuti kabalindilila acuumbwe.
Pele kucili kooko mubuzuba bwatatu Jesu kafwide, mungelo wa Jehova cakutayeeyelwa waboola. Walikunkulisya bbwe lili acuumbwe. Basikalumamba bayoowa kapati cakunga tabakonzyi akweenda. Balange mucuumbwe bajana kuti mubili tuuko. Bamwi basikalumamba baunka mumunzi kwaakwaambila bapaizi. Hena ulicizyi bapaizi babi ncobacita? Babapa mali basikalumamba kuti babeje. Bapaizi baambila basikalumamba kuti: ‘Mwaambe kuti basikwiiya bakwe baboola masiku nitwali koona baubweza mubili.’
Kwiinde ciindi, bamakaintu beenzyinyina a Jesu baboola kucuumbwe. Elo balamwa nibajana kuti taku ciliko mucuumbwe! Cakutayeeyelwa bangelo bobilo basamide zisani zituba basika. Babuzya kuti: ‘Nkaambo nzi ncomumulangaula Jesu kuno? Wabusyigwa. Amufwambaane kamuya mukabaambile basikwiiya bakwe.’ Ma! elo nkubalika bamakaintu! Pele kabacili munzila muntu umwi wabaimika. Hena ulimuzyi? Ngu Jesu! Wati: ‘Kamuya mubaambile basikwiiya bangu.’
Bamakaintu babaambila basikwiiya kuti Jesu wabuka akuti bamubona, pele basikwiiya tiibaasyoma makani aaya. Pita a Johane babalika kucuumbwe kuti bakalibonene, pele bajana kuti taku ciliko mucuumbwe. Pita a Johane bazwe, Maliya Magadala wasyaala acuumbwe ulikkede. Nceciindi walo ncaalanga mucuumbwe akubona bangelo bobilo.
Hena ulicizyi cakacitika kumubili wa Jesu? Leza wakauzibaanya. Leza tanaakamubusya Jesu kajisi mubili wanyama ngwaakafwa anguwo. Wakamupa Jesu mubili mupya wamuuya mbuli njobajisi bangelo kujulu. Pele kutegwa atondezye basikwiiya bakwe kuti wakabuka, Jesu ulakonzya kucinca akuba amubili bantu ngobakonzya kubona kweelana ambotulaaiye kumpela.
Matayo 27:62-66; 28:1-15; Luka 24:1-12; Johane 20:1-12.
Mibuzyo
- Ngwani mukaintu uuli acifwanikiso, alimwi mbabaani basankwa bobilo, ino nkuli nkobabede?
- Nkaambo nzi Pilato ncaatumina basikalumamba kulindila cuumbwe ca Jesu?
- Ncinzi ncaakacita mungelo kucili kooko mubuzuba bwatatu Jesu kafwide, pele ncinzi bapaizi ncobacita?
- Nkaambo nzi bamakaintu balamwa nibasika kucuumbwe ca Jesu?
- Nkaambo nzi Pita a Johane ncobabalika kucuumbwe ca Jesu, alimwi ncinzi ncobajana?
- Ncinzi cakacitika kumubili wa Jesu, pele ncinzi ncaacita Jesu kucita kuti abatondezye basikwiiya kuti wakabuka?
Mibuzyo aimwi
- Bala Matayo 27:62-66 a 28:1-15.
Mbuti bapaizi basilutwe, Bafalisi, alimwi abapati mbobakabisyizya muuya uusalala Jesu naakabuka? (Mt. 12:24, 31, 32; 28:11-15)
- Bala Luka 24:1-12.
Mbuti cibalo cakubuka kwa Jesu mbocitondezya Jehova mbwababona bamakaintu kuti mbaakamboni basyomeka? (Lk. 24:4, 9, 10; Mt. 28:1-7)
- Bala Johane 20:1-12.
Mbuti Johane 20:8, 9 mbwatugwasya kubona mbociyandika kukkazyika moyo ikuti tiitwamvwisya kuzuzikizyigwa kwabusinsimi bumwi bwa Bbaibbele? (Tus. 4:18; Mt. 17:22, 23; Lk. 24:5-8; Joh. 16:12)
Andiza Inga Mwaakkomanina Ayaaya
JESU—NENZILA, NGOKASIMPE, MBOBUUMI
Jesu Uubusyidwe Walibonya Kubantu Banji
Ino mbuti Jesu mbwaatondezya basikwiiya bakwe kuti wakabusyigwa ncobeni?
MIBUZYO YAMU BBAIBBELE YAINGULWA
Sena Mubili wa Jesu Wakali Wanyama naa Wamuuya Naakabusyigwa?
Bbaibbele lyaamba kuti Jesu “wakajaigwa kali amubili wanyama pele wakabusyigwa amubili wamuuya,” ino basikwiiya bakwe bakamubona buti naakabusyigwa?
NGAZI YAMULINDIZI
Lufwu lwa Jesu Alimwi Abubuke Bwakwe
Twaambo tuli cisambomwe itupandulula lufwu lwamuntu omwe mbolukonzya kupa kuti bantu banji bapone.
