БО херээженни база ол ийи эр кижини, билир сен бе? Ол дээрге Иисусту эки билир турган кижилерниң бирээзи, Мария Магдали́на-дыр. А ак хептиг эр кижилер — дээрниң төлээлери-дир. Иисустуң мага-бодун салып каан бичии өрээлче Мария бакылап көрген. Ол өрээлди чевег дээр. Ынчалза-даа мында мага-бот чок! Ону кым аппарганыл? Билип алыылам.

Иисус өлүп каарга, бараалгакчылар Пила́тка чугаалаан: ‘Иисус дириг тургаш, бодун үш хонгаш, дирлип кээрин баш удур чугаалаан. Ынчангаш чевегни кадарар кылдыр дужаалдан бер. Ынчан ооң өөреникчилери мага-ботту оорлай албас, база ол өлүглерден дирлип келген деп чарлап шыдавас!’ Чевегни кадарар кылдыр шериглер чоргузарын бараалгакчыларга Пила́т дужааган.

Ынчалза-даа Иисустуң өлүмүнүң соонда үш дугаар хүнде, эртен эрте, хенертен Иегованың төлээзи көстүп келген. Ол чевегден дашты чайладыр чуупкан. Шериглер кортканындан ол-ла черинге аңгадай бергеннер. Олар чевег иштинче бакылаптарга — мага-бот чок болган! Каш шериглер болган чүвени бараалгакчыларга дыңнадыр дээш, хоорайже маңнапкан. Ол каржы бараалгакчылар чүнү кылган, чүү деп бодаар сен? Олар шериглерге мегелезин дээш акша берген. ‘Дүне удуп чыдырыңарда, өөреникчилери келгеш, мага-ботту оорлапкан деп чугаалаңар’,— деп, шериглерге бараалгакчылар дужааган.

Иисусту эки билир турган херээженнер ол үеде чевегге чедип келген. Чевег куруг боорга, олар кайы-хире кайгаан деп! Хенертен чырып турар хептиг ийи дээрниң төлээлери тыптып келген. ‘Чүге мында Иисусту дилеп тур силер?— деп, олар херээженнерден айтырган.— Ол дирлип келген. Дүрген барып, ол дугайында өөреникчилерге дыңнадыңар’. Херээженнер кайы-хире дүрген маңнап чоруткан-дыр! Хенертен орукка бир-ле кижи оларны тургузупкан. Кымыл, билир сен бе? Иисус! ‘Баргаш, мээң өөреникчилеримге чугаалаңар’,— деп, ол дужааган.

Ынчалза-даа олар өөреникчилерге Иисус дириг база олар ону көрген деп чугаалаарга, өөреникчилерге аңаа бүзүрээри берге болган. Ынчангаш Пётр биле Иоа́нн боттарының караа-биле көөр дээш, чевегже маңнапканнар, оон бо — чевег куруг! Пётр биле Иоа́нн чоруптарга, Мария Магдали́на артып калган. Ол чевегже бакылапкаш, хенертен дээрниң ийи төлээзин көрүп каан.

Иисустуң мага-боду-биле чүү болган, билир сен бе? Бурган мага-ботту чиде бээр кылдыр кылыпкан. Ол Иисусту ооң өлгени кижи мага-бодунче диргиспээн. А дээрниң төлээлеринде ышкаш, чаа сүлде мага-ботту аңаа берген. Ынчалза-даа дириг мен деп бадыткаар дээш, ол өөреникчилеринге кижи караа-биле көрүп болур мага-боттуг келген дээрзин билип алыр бис.