ANA akummanyilila jwamkongweju, soni acalume ŵaŵiliŵa? Jwamkongweju ali Maliya Magadala, mjakwe jwa Yesu. Soni acalume ŵawete yeswelaŵa ali malayika. Kacipinda kakulola Maliyako kali malo gaŵaŵisile mtembo wa Yesu. Kacipindaka kali lilembe. Nambo sambano mtembo wa Yesu mwangali! Nduni jwajigele? Kwende tulole.

Yesu ali agambile kuwa, ŵambopesi akumsalila Pilato kuti: ‘Yesu paŵaliji cijumi ŵaŵecete kuti cacijimuka pali papite masiku gatatu. M’yoyo alamule kuti ŵane akalondeleje lilembe lyakwe. Kuti ŵakulijiganya ŵakwe akajiŵa cilu cakwe nikusalaga kuti jwalakwe ajimwice ku ŵawe!’ Pilato akwasalila ŵambopesi kuti atumisye asilikali kuti akalindilileje lilembe lyakwe.

Nambo kundaŵindaŵipe lisiku lyatatu ciwile Yesu, lilayika lya Yehofa mwangajembeceya likwika. Likutyosya liganga pa lilembe lila. Asilikali ŵala akutenda woga mnope mwati akulepela kwenda. Kumbesi kwakwe, pakulola mwilembe mula, mtembo wula mwangali! Ŵane mwa asilikaliŵa akwawula mumsinda kukwasalila ŵambopesi. Ana akumanyilila yakutenda ŵambopesi ŵakusakalaŵa? Akwapa mbiya asilikali kuti alambusyeje. Ŵambopesiŵa akwasalila asilikali kuti: ‘Asaleje kuti ŵakumkuya ŵakwe ŵayice cilo tuli tugonile, kukwiŵa mtembo wa Yesu.’

Kaneko acakongwe ŵali acimjakwe Yesu akwisa ku lilembe kula. Akusimonga mnope kusimana kuti mwangali cilicose! Kaneko mwakusisimucisya gakuwonecela malayika gaŵili gali gawete yakuwala yakuŵala mnope. Malayikaga gakuwusya kuti: ‘Ana ligongo cici akumlolesya Yesu akuno? Jwalakwe amjimwisye. Ajawule mwacitema akasalile ŵakumkuya ŵakwe.’ Acakongweŵa akuwutuka kwamnope! Nambo petala jwamlume akwajimika. Ana akummanyilila kuti ali nduni? Ali Yesu! Jwalakwe akwasalila kuti: ‘Ajawule akasalile ŵakunguya ŵangu.’

Acakongweŵa pakwasalila ŵakumkuya ŵakwe kuti Yesu ali cijumi, soni kuti am’weni, ŵakumkuyaŵa ngakukulupilila. Petulo ni Yohane akuwutucila ku lilembe kula kuti akalilolele acimsyene, nambo akusimana kuti mwilembe mwangali cilicose! Petulo ni Yohane pakutyoka ku lilembe kula, Maliya Magadala akusigalila munyuma. Pandaŵiji ni paŵalolite mkati mwa lilembe nikugawona malayika gaŵiliga.

Ana akumanyilila yayatendecele mtembo wa Yesu? Mlungu ŵatendekasisye kuti ukawoneka. Mlungu nganamjimusya Yesu ku umi mu cilu caumundu mpela caŵakwete paŵawaga. Jwalakwe ŵampele Yesu cilu casambano causimu, mpela ca malayika kwinani. Nambo pakusaka kwalosya ŵakumkuya ŵakwe kuti jwalakwe ali cijumi, Yesu ŵakolaga cilu cakuti ŵandu akombolece kum’wona, mpela mwacituyiwonele.