I Kicika ma Gicego Doge
Ododo 103
I Kicika ma Gicego Doge
KA Petero gin ki Jon gua woko ki i lyel ka ma kom Yecu onongo tye iye, Maliam odong kunnu kene. En ocako koko. Ci en okulle me neno i lyel, kit ma waneno kwede i cal ma okato-ni. Kunnu en oneno lumalaika aryo! Gin gupenye ni: ‘Pingo itye ka koko?’
Maliam ogamo ni: ‘Gikwanyo Rwoda woko, dok pe angeyo ka ma gukete iye.’ I ngeye Maliam olokke ci oneno laco mo. En openye ni: ‘Anga mono ma itye ka yenyo-ni?’
Maliam tamo ni laco-ni obedo latic i poto-ni, dok ni en omyero bed okwanyo kom Yecu woko. Pi meno en owaco ni: ‘Ka ikwanyo en woko, titta ka ma ikete iye.’ Ento, i adane, laco-ni aye Yecu. En oketo kom ma Maliam pe romo ngeyone. Ento i kare ma en olwonge ki nyinge, Maliam ongeyo woko ni man kara Yecu. En oringo ci owaco bot lupwonnye ni: ‘An aneno Rwot!’
Otyeno, i kare ma lupwonnye aryo gitye ka wot me cito i paco me Emau, laco mo onywako wot kwedgi. Lupwonnye-ni cwinygi tye ka wang mada pien gineko Yecu woko. Ento ka gimedde ki wot, laco-ni otittigi jami mapol ki i Baibul ma okweyo cwinygi. I agikkine, ka gucung ka mo ka cam, lupwonnye-ni guniang woko ni laco-ni kara Yecu. Ci Yecu orweny woko, ci lupwonnye aryo-ni gudok wa i Jerucalem ka tito pire bot lukwena.
Ma man tye ka timme, Yecu onyutte bene bot Petero. Jo mukene-ni cwinygi obedo yom ka guwinyo man. Ci lupwonnye aryo magi gucito Jerucalem ci gunongo lukwena. Gin gutitigi kit ma Yecu bene onyutte kwede botgi i gudo. Dok ma pud gitye ka tito lok man, in ingeyo gin me aura mutimme?
Nen cal-li. Yecu onen kunnu wa i kicika, kadi bed doggola onongo gicego woko. Lupwonnye cwinygi pud dong obedo yom ya! Meno pe obedo nino maber mada? Itwero kwano tyen adii ma Yecu onyutte kwede kombeddi bot lulub kore? Ikwano tyen abic?
I kare ma Yecu onyutte lakwena Tomaci onongo pe tye kacel kwedgi. Pi meno Lupwonnye guwacce ni: ‘Wan waneno Rwot!’ Ento Tomaci owaco ni wang ma eneno Yecu ka eye. Ber, lacen i nge nino aboro lupwonnye dok gubedo kacel i ot ma gicego, kun i cawa man Tomaci bene onongo tye kacel kwedgi. Atura lipip, Yecu onyutte woko i kicika ka kenyo. Kombeddi dong Tomaci oye.
