BENƐ Petro kɛ Yohane je Yesu yɔkɔ ɔ he ɔ, e piɛ Maria nɔ kake pɛ ngɛ lejɛ ɔ. E bɔni ya fomi. Kɛkɛ nɛ e ka yi si kɛ hyɛ yɔkɔ ɔ mi kaa bɔnɛ wa na ngɛ foni kaketsɛ ɔ mi ɔ. E na bɔfohi enyɔ ngɛ lejɛ ɔ! A bi lɛ ke: ‘Mɛni heje o ngɛ ya foe?’

Maria ha heto ke: ‘A ba ngɔ ye Nyɔmtsɛ ɔ kɛ je, nɛ i li he nɛ a ngɔ lɛ kɛ ya fɔ.’ Kɛkɛ nɛ Maria plɛ e se nɛ e na nyumu ko. Nyumu ɔ bi lɛ ke: ‘Mɛnɔ o ngɛ hlae?’

Maria susu kaa abɔɔ ɔ mi ní tsulɔ ji nyumu ɔ, nɛ eko ɔ, lɛ nɛ e ba ngɔ Yesu gbogboe ɔ kɛ je. Lɔɔ he ɔ, e de lɛ ke: ‘Ke mo lɛ o ba ngɔ e gbogboe ɔ, tsɔɔ mi he nɛ o ngɔ lɛ kɛ ya fɔ.’ Se ngɛ anɔkuale mi ɔ, nyumu ɔ ji Yesu. Nɔmlɔtso nɛ e hɛɛ ɔ ha nɛ Maria yo we lɛ. Se benɛ e ngɔ Maria biɛ kɛ tsɛ lɛ ɔ, Maria na kaa Yesu ji lɛ. E tu fo nɛ e ya de kaseli ɔmɛ ke: ‘I na Nyɔmtsɛ ɔ!’

Pee se ngɛ jamɛ a ligbi ɔ nɔ ɔ, kaseli enyɔ komɛ nyɛɛ kɛ yaa kɔpe ko nɛ a tsɛɛ lɛ Emao ɔ mi, nɛ nyumu ko ya ná mɛ ngɛ blɔ ɔ nɔ. Kaseli ɔmɛ ngɛ aywilɛho yee ejakaa a gbe Yesu. Se benɛ a yaa ngɛ blɔ nɔ ɔ, nyumu ɔ tsɔɔ mɛ Baiblo ɔ mi ní komɛ a nya, nɛ lɔɔ ha a bua jɔ bɔɔ. Lɔɔ se, benɛ a ya hi si konɛ a ye ní ɔ, kaseli ɔmɛ ba le nyumu ɔ mi tso kaa Yesu ji lɛ. Se Yesu laa mɛ, kɛkɛ nɛ amlɔ nɔuu nɛ kaseli enyɔ ɔmɛ kpale a se kɛ ho Yerusalem ya tɔ̃ɔ ekohu, konɛ a ya bɔ bɔfo ɔmɛ amaniɛ.

Benɛ enɛ ɔ ngɛ nɔ yae ɔ, Yesu je e he kpo kɛ tsɔɔ Petro hu. Nɛ benɛ ni kpa amɛ nu he ɔ, a bua jɔ. Jehanɛ ɔ, kaseli enyɔ ɔmɛ ya su Yerusalem nɛ a ya na bɔfo ɔmɛ. A bɔ mɛ bɔnɛ Yesu je e he kpo kɛ tsɔɔ mɛ ngɛ blɔ ɔ nɔ ha. Se benɛ a ngɛ mɛ amaniɛ ɔ bɔe ɔ, o le nyakpɛ nɔ́ ko nɛ ba lo?

Hyɛ foni ɔ. Yesu ba je e he kpo ngɛ tsu ɔ mi, be mi nɛ a ngmɛ sinya a mi. Kaseli ɔmɛ a bua jɔ wawɛɛ! Anɛ pi bua jɔmi ligbi ji nɛ ɔ lo? Kɛ ba su hiɛ ɔ, anɛ o ma nyɛ maa kane si abɔ nɛ Yesu je e he kpo kɛ tsɔɔ e kaseli ɔmɛ lo? O kane nɛ e su si enuɔ lo?

Bɔfo Toma piɛɛ we a he benɛ Yesu je e he kpo kɛ tsɔɔ mɛ ɔ. Lɔɔ he ɔ, kaseli ɔmɛ de lɛ ke: ‘Wa na Nyɔmtsɛ ɔ!’ Se Toma de ke ja lɛ nitsɛ e na Yesu loko e ma he ye. Ligbi kpaanyɔ se ɔ, kaseli ɔmɛ bua a he nya ekohu ngɛ tsu ko nɛ́ a ngmɛ nya mi, nɛ Toma piɛɛ a he. Si kake too ɔ, Yesu ba hia si ngɛ tsu ɔ mi. Toma he ye jehanɛ ɔ.