PEDRO ka Juan tripalu wüla ti rügan lolo chew ñi mülemum Jesu ñi kuerpu, Maria kidulewey. Ngüman-nagi. ¡Fey mew lelikoni rüngan lolo mew, ka pefi epu küme werken püllü! Fey engu ramtueyew: ‘¿Chumngelu (chemu) anta ngümaymi (ngümapeymi)?’

Maria llowdunguy: ‘Yengey tañi Ñidol, ka kimlan chew ñi elkünungen.’ Fey mew wiñowlu ka pey kiñe wentru. Fey ramtueyew Maria: ‘¿Iney anta kintupefimi?’

Maria rakiduamkülerkey feychi wentru tati kuydarayenfe (kuydachichikenfe), entufilu (nentufilu) Jesu ñi kuerpu trokifi. Feymu lle feypi: ‘Eymi yetufilmi, feypien chew tami elkünufiel.’ Welu tüfachi wentru Jesu ürke. Niey kiñe kuerpu Maria kimnielaeyew. Welu mütrümelu Maria ñi üy mew, tati domo kimi tüfa ta Jesu. Maria lef amuy ñi feypiafiel tati pu inanielu: ‘¡Pefiñ ta Ñidol!’

Feychi antü wüla, petu amulelu engu epu inaniekelu Jesu tati pichi waria Emaw pingelu, kiñe wentru trawüy engu. Tati pu inanielu rume weñangküleyngu Jesu ñi lan mu. Welu petu trekalelu engün, tüfachi wentru kimelelfi fentren dungu Biblia mu, ka fey engün doy küme duamnagingün. Af mew, witrakünuwlu ñi yafütual, tati epu inanielu kimtufingu tüfachi wentru ñi Jesu ngen. Ñamfemtuy, ka fey engu wiño amutuy Jerusalen waria mu ñi kimelafiel tati pu apostol.

Petu rupalu tüfa, Jesu ka pewfaluwi ta Pedro. Kakelu allkütulu tüfachi dungu pürapapiwkeyngün. Fey mu feychi epu inanielu amuy Jerusalen mu, ka pefingu tati pu apostol. Nütramelfi chumngechi Jesu pewfaluwi fey engu rüpü mu. Ka petu ñi nütramkan engu, ¿kimimi chem afmatufalchi dungu rupay?

Adkintufinge ti adentun. Jesu pewfaluwi feychi mu ti katrüntüku mu, rakümniengey ti wülngiñ. ¡Rume ayüwküleyngün tati pu inanielu! ¡Müna pürapapiwkengechi antü tati! ¿Rakintuafuymi tunten rupa pewfaluwi Jesu fewla? ¿Kechu pe may?

Pewfaluwlu Jesu, ti apostol Toma ngerkelay kidu engün. Feymu lle, tati pu inanielu feypieyew: ‘¡Pefiyiñ ta Ñidol!’ Welu Toma feypifi engün: ‘Iñche pefili, fey wüla feyentuan (mupituan).’ Rupalu pura antü wüla, tati pu inanielu ka wiño trawüleyngün kiñe rakümkülechi katrüntüku mu, ka müley Toma fey engün mu. Feychi Jesu pewfalurumey fey mu. Fewla Toma feyentuy (mupituy).