MERI i stap krae, i stap stanap afsaed long hol long ston we oli putum dedbodi blong Jisas long hem. Pita mo Jon, tufala i aot finis blong gobak long ples blong tufala. Nao Meri i bendaon, i lukluk i go insaed long hol ya, olsem yumi luk finis long laswan pija. !Hem i luk tu enjel i stap! Tufala i askem long hem se: ‘?Yu yu stap krae from wanem?’

Meri i talem se: ‘Oli tekemaot bodi blong Masta blong mi, nao mi mi no save weples oli putum.’ Nao Meri i tanraon, i luk wan man i stap stanap. Man ya i askem long hem se: ‘?Yu yu stap lukaot hu?’

Meri i ting se man ya i man blong lukaot long plantesen blong tri ya olif, hem i ting se maet man ya nao i tekem bodi blong Jisas. Ale hem i talem long hem se: ‘Sipos yu yu karemaot bodi blong hem, mo yu putum hem samples, plis yu talem long mi, blong mi save go karem hem.’ Be, man ya hem i Jisas. Hem i gat wan bodi we Meri i no luksave. Be taem hem i singaot nem blong Meri, Meri i save nao se hemia Jisas. Ale hem i resis i go talem long ol disaepol se: ‘!Olgeta! !Mi mi luk Masta blong yumi!’

Long sem dei ya nomo, tu disaepol blong Jisas, tufala i stap wokbaot blong go long wan vilej, nem blong hem Emeas. Tufala i harem nogud from we Jisas i ded. Be taem tufala i stap wokbaot, wan man i kam klosap long tufala, i stap wokbaot i go wetem tufala. Man ya i stap eksplenem plante samting long saed blong Baebol, we i mekem tufala i haremgud. Taem trifala i stop blong kakae smol, tufala disaepol i luksave se man ya hem i Jisas. Be hem i lus long fes blong tufala, tufala i no moa luk hem. Nao wantaem nomo, tufala i girap, tufala i aot long ples ya, tufala i folem rod i gobak long Jerusalem blong talemaot ol samting ya long ol aposol.

Taem tufala i stap wokbaot i gobak, Jisas i kamtru long Pita. Ol narafala disaepol oli harem nius ya, mo oli glad we oli glad. Nao tufala disaepol ya, tufala tu i kamtru long Jerusalem, mo tufala i talemaot long ol aposol we Jisas i kamtru long tufala long rod. ?Taem tufala i stap storian olsem, yu save wanem i hapen?

Lukluk long pija ya. Jisas i kam stanap long medel blong olgeta, nating se oli lokem doa blong rum ya finis. !Ol disaepol ya oli glad tumas! Dei ya i rili spesel long olgeta. ?Yu yu save hamas taem Jisas i bin kamtru long ol man blong hem afta we hem i laef bakegen? ?Yu yu kaontem faef taem?

Be taem Jisas i kamtru, aposol ya Tomas i no stap wetem olgeta. Ale ol disaepol oli talem long Tomas se: ‘!Mifala i luk Masta blong yumi!’ Be Tomas i no bilivim olgeta. Hem i talem se sipos hem i luk Jisas wetem prapa ae blong hem, long taem ya nao, bambae hem i jes bilif, sipos no, hem i no save bilif. Eit dei i pas, nao ol disaepol blong Jisas, oli stap wanples long haos ya bakegen, mo oli lokem doa. Long taem ya, Tomas i stap wetem olgeta. Nao wantaem nomo, Jisas i kam stanap long medel blong olgeta. Naoia, Tomas i bilif.

Jon 20:11-29; Luk 24:13-43.