Maana 103nan

So da sɔgɔlen dɔ kɔnɔ

TUMA min na Piɛrɛ ni Yuhana bɔra kaburu la, Yesu su dayɔrɔ la, Mariyama kelen tora yen. A ye kasi daminɛ. I ko an y’a ye cogo min na ja tɛmɛnen kan, Mariyama tilala ka a biri ka kaburu kɔnɔna lajɛ. A ye mɛlɛkɛ fila ye yen minnu y’a ɲininka ko: ‘I bɛ ka kasi mun na?’

Mariyama ye u jaabi ko: ‘U ye ne Matigi su ta, ne t’a dɔn u y’a bila yɔrɔ min na.’ Mariyama y’a kɔ filɛ tuma min na, a ye cɛ dɔ ye min y’a ɲininka ko: ‘E bɛ ka jɔni ɲini?’

A kɛra Mariyama kɔnɔ ko nakɔtigi don, ko i b’a sɔrɔ ale de ye Yesu su ta. O kosɔn, Mariyama y’a fɔ a ye ko: ‘Ni e de y’a ta, a fɔ ne ye i y’a bila yɔrɔ min na.’ Nka, o cɛ tun ye Yesu yɛrɛ de ye tigitigi. Yesu ye farikolo min ta, Mariyama tun t’ale dɔn ni o farikolo ye. Nka Yesu ye Mariyama ta a tɔgɔ ma tuma min na dɔrɔn, Mariyama y’a dɔn ko Yesu don. A bolila ka taa a fɔ kalandenw ye ko: ‘Ne ye Matigi ye ne ɲɛ la.’

O don kelen na, kalanden fila tun bɛ ka taa Emayus tuma min na, cɛ dɔ nana fara u kan sira kan. Kalandenw tun ɲɛnasisilen don kosɛbɛ bawo Yesu fagara. Nka, cɛ min nana fara kalandenw kan, o ye Bibulu kɔnɔko caman ɲɛfɔ u ye. O kumaw ye kalandenw hakili sigi kosɛbɛ. U jɔra waati min na ka dumuni kɛ, kalandenw y’a dɔn o tuma de la ko o cɛ tun ye Yesu de ye. Nka, Yesu tununna u ɲɛkɔrɔ o yɔrɔnin bɛɛ la. O kɛra minkɛ, kalanden fila ye u teliya ka segin Jerusalɛm, k’o fɔ cidenw ye.

Yesu y’a yɛrɛ jira Piɛrɛ fana na. Tɔw ye o mɛn tuma min na, u nisondiyara kɔsɛbɛ. Kalanden fila selen Jerusalɛm tuma min na, u ye cidenw ye. Yesu ye a yɛrɛ jira olu la cogo min na sira kan, u ye o fɔ cidenw ye. U tun bɛ ka o ko ɲɛfɔ tuma min yɛrɛ la, i b’a dɔn kabako min kɛra wa?

E ka ja lajɛ. Yesu sinna ka a yɛrɛ jira so kɔnɔ ten, k’a sɔrɔ da tun sɔgɔlen bɛ. Kalandenw nisɔndiyara kosɛbɛ. Yala o tun tɛ ɲagalidon ye wa? I bɛ se k’a fɔ siɲɛ hakɛ min na Yesu y’a yɛrɛ jira a ka kalandenw na wa? Yala siɲɛ duuru wa?

Yesu y’a yɛrɛ jira u la tuma min na, ciden Tɔma tun tɛ yen.  Kalandenw y’a fɔ Tɔma ye ko: ‘An ye Matigi ye an ɲɛ na.’ Nka Tɔma ko ale tɛ da o la fo ni ale yɛrɛ ɲɛ dara Yesu kan. Tile segin o don kɔfɛ, kalandenw bɛɛ tun lajɛlen bɛ kokura so kɔnɔ. U tun ye da sɔgɔ u yɛrɛ da la. Nin sen in na Tɔma tun bɛ yen. Yɔrɔnin kelen dɔrɔn, Yesu sinna ka a yɛrɛ jira u la, so kɔnɔ yen. Tɔma dara a la sa.

Yuhana 20:​11-29; Luka 24:​13-43.