APRE ki Pyer ek Zan ti kit tonbo kot lekor Zezi ti ete, Mari ti reste la li tousel. I ti konmans plere. Apre i ti avanse e get dan tonbo, parey ou kapab vwar dan sa portre. I ti vwar de lanz dan tonbo! Zot ti demann li: ‘Akoz ou pe plere?’

Mari ti reponn: ‘Zot in pran mon Senyer, e mon pa konnen kote zot in met li.’ Apre Mari ti vire e i ti vwar en zonm. Sa zonm ti demann li: ‘Lekel ki ou pe rode?’

Mari ti krwar ki sa zonm ti en zardinyen, e ki i ti’n kapab pran lekor Zezi. Alor i ti dir: ‘Si ou’n pran li, dir mwan kote ou’n met li.’ Me sa zonm ti Zezi li menm. I ti annan en nouvo lekor ki Mari pa ti kapab rekonnet. Me kan Zezi ti apel Mari par son non, i ti konnen ki se Zezi ki ti pe koz avek li. I ti taye e rakont bann disip: ‘Mon’n vwar Senyer!’

Plitar dan lazournen, pandan ki de disip ti pe al dan vilaz Emais, en zonm ti aprose e mars avek zot. Sa de disip ti vreman tris akoz Zezi ti’n ganny touye. Me pandan ki zot ti pe marse, sa zonm ti eksplik zot en ta keksoz dan Labib ki ti fer zot santi zot pli byen. Finalman, kan zot ti arete pour pran en repa, bann disip ti rekonnet ki sa zonm ti Zezi. Apre, Zezi ti disparet, e sa de disip ti retourn Zerizalenm pour rakont bann zapot lo Zezi.

Pandan ki sa ti pe deroule, Zezi ti osi aparet avek Pyer. Lezot ti eksite kan zot ti antann sa. Apre sa de disip ti al Zerizalenm e trouv bann zapot. Zot ti rakonte konman ki Zezi ti’n aparet avek zot lo semen. Pandan ki zot ti pe rakont sa, en keksoz merveye ti arive. Ou konnen kwa?

Get sa portre. Zezi ti aparet la dan sa lasanm, menm si laport ti fermen. Bann disip ti vreman kontan. Pa i ti en zour eksitan? Eski ou rapel ki kantite fwa Zezi ti’n aparet avek son bann disip ziska prezan? Senk fwa, non?

Zapot Toma pa ti avek zot kan Zezi ti aparet. Alor bann disip ti dir avek li: ‘Nou’n vwar Senyer!’ Me Toma ti dir ki i bezwen vwar Zezi li menm avan ki i krwar. Byen, wit zour plitar bann disip ti ansanm dan en lasanm ki ti fermen, e safwasi Toma ti avek zot. Toudenkou, Zezi ti aparet la dan sa lasanm. Aprezan Toma ti krwar.