NUʼUNAPA Pedro otta Juan eejachire niʼitaanüin Jesús, apütüüsü María sünain aʼyalajaa. ¡Shiʼraka piamashii aapiee suluʼu tü woowirakat! Namaka: ‹¿Jamüsü piʼyalajaka?›

Sümaka: ‹Ayuʼnnushi chi Tasenyotsekai, nnojoishi tatüjaain aaʼu jalain nia alüʼüjünüin›. Shiirakaaka süchiiruajee shiʼraka wanee wayuu. Nümaka: ‹¿Jara püchajaaka achiki?›

Aʼyataaiyaa saaʼinruʼu chi wayuukai suluʼu tü apainkat otta niayaa saashin chi alüʼüjakai Jesús, sümaka: ‹Piale alüʼüjüin Jesús, jalashi nia putuma›. Chi wayuukai nia Jesús. Nnojoishi shiyaawatüin nia María. Neenajapa shia süka sünülia shiyaawataka nia. Suʼunaka otta sümaka namüin na nikirajüinkana: ‹¡Teʼrüichipa chi Senyotkai!›

Oʼunushii piamashii nikirajüin eemüin tü mmakat Emaús, nuʼunaka wanee wayuu namaa. Mojusü naaʼin na nikirajüinkana Jesús sükajee ouktuin nia. Nüküjaka chi wayuukai namüin wainma kasa suluʼujee tü Wiwüliakat, anaka naaʼin sutuma. Neemeraapa nayaawataka niain Jesús chi wayuukai. Nnojoijaaka Jesús otta naleʼejaka Jerusalénmüin süpüla naapirüin na aluwataaushiikana.

Wanaa sümaa tia, eeʼiyataashi Jesús nümüin Pedro. Talatüshii na waneeinua naapapa tia. Noʼunaka na piamashiikana nikirajüin Jerusalénmüin nantiraaka namaa na aluwataaushiikana. Naküjaka namüin niiʼiyataain Jesús wopuluʼu. Wanaa sümaa naküjüin tia, ¿pütüjaa aaʼu tü alatakat?

Eeʼiyataashi Jesús namüin paülüʼü sümaa süttüin soʼu tü piichikat maʼaka piʼrüin suluʼu tü ayaakuaakat. ¡Talatüshii na nikirajüinkana! ¡Anasü maʼin namüin tü alatakat soʼu kaʼikat tia! ¿Jeʼratuaichi eeʼiyataain Jesús? Jaʼraituaichi.

Nnojoishi eejachin Tomás wanaa sümaa niiʼiyataain Jesús. Namaka na waneeinua nümüin: ‹¡Weʼrüichipa chi Senyotkai!› Niʼrüinjachi nia Tomás naashin süpüla nunoujuin. 8 kaʼi süchikijee tia, eeʼiyataashi Jesús namüin paülüʼü otta eejachi Tomás namaa, nunoujaka Tomás.