PETERO bona Ioane ese Iesu ena guria gabuna idia rakatania murinai, Maria sibona be unuseniai idia rakatania. Ia tai matamaia. Bena ia igo diho bona guria gabuna lalonai ia itaia, sivarai 102 dekenai ita itaia laulauna bamona! Unuseniai aneru rua ia itaia! Ia idia nanadaia: ‘Dahaka dainai oi tai?’

Maria ia haere: ‘Egu Lohiabada idia abia lao vadaeni, bona idia atoa gabuna lau diba lasi.’ Bena Maria ia giroa bona tau ta ia itaia. Unai tauna ese ia nanadaia: ‘Daika oi tahua noho?’

Maria ia laloa unai tauna be uma gabu naria tauna, bona reana ia ese Iesu ena tauanina ia abia lao. Unai dainai ia gwau: ‘Bema oi abia lao, lau oi hadibaia edeseniai oi atoa.’ To, momokani, inai tauna be Iesu. Ia be Maria ia diba lasi tauanina ta ia karaia. To ena ladana ia boiria neganai, Maria ia diba inai be Iesu. Ia heau bona hahediba taudia ia hamaoroa: ‘Lohiabada lau itaia vadaeni!’

Gabeai unai dina dekenai, hahediba taudia rua be Emausa hanuana dekenai idia raka lao noho lalonai, tau ta ese idia ia bamoa. Hahediba taudia idia lalohisihisi bada badina Iesu idia hamasea. To idia raka noho lalonai, inai tauna ese Baibel amo gau momo ia gwauraia, unai ese edia lalona ia hanamoa. Dokonai, hahediba taudia be aniani totona idia laga-ani neganai, idia lalo-parara unai tauna be Iesu. Bena Iesu ia boio, bona unai hahediba taudia rua be Ierusalema dekenai idia giroa lou haraga aposetolo taudia idia hadibaia totona.

Unai ia vara noho lalonai, Iesu be Petero dekenai ia hedinarai danu. Ma haida ese unai idia kamonai neganai idia moale. Bena unai hahediba taudia rua be Ierusalema dekenai idia lao bona aposetolo taudia idia davaria. Iesu be dala ai idia dekenai ia hedinarai sivaraina be idia dekenai idia gwauraia. Bona unai idia gwauraia noho neganai, ia vara hoa gauna oi diba, a?

Inai laulau oi itaia. Ena be iduara idia lokaia, to Iesu be inai daiutu lalonai ia hedinarai. Hahediba taudia idia moale bada! Unai be moale dinana, ani? Iesu be ena murinai idia raka taudia dekenai ia hedinarai negadia ibounai oi duahia, a? Nega 5 oi duahia, a?

Iesu ia hedinarai neganai aposetolo Toma be idia danu ia noho lasi. Unai dainai hahediba taudia ese ia idia hamaoroa: ‘Lohiabada ai itaia vadaeni!’ To Toma ia gwau do ia abia dae lasi ela bona ia sibona ese Iesu ia itaia. Vadaeni, dina 8 murinai, hahediba taudia be idia lokaia daiutuna ta lalonai idia hebou lou, bona Toma danu ia noho. Bena nega tamona, Iesu be daiutu lalonai ia hedinarai. Vadaeni, Toma ia abia dae.