Jesus me rimunikisa kovahongewa ve metuwo nda paterwe
EHUNGI 103
Jesus me rimunikisa kovahongewa ve metuwo nda paterwe
KOMBUNDA yaindu Petrus na Johanes tji va za peyendo mu mwa ri orutu rwaJesus, Maria wa sewa ngo erike. Eye wa uta okurira. Okuzambo eye we ripeta na natere meyendo, otja tji twa munu motjiperendero tjehungi 102. Eye wa muna mo ovaengeli vevari! Owo ve mu pura nave tja: ‘Ove mo ririre tjike?’
Maria we ve zira na tja: ‘Owo va toora oMuhona wandje ave twara, nu hi nokutjiwa kutja ve kemutwa pi.’ Okuzambo Maria wa tanauka na munu omurumendu worive. Omurumendu ngwi wa pura Maria na tja: ‘Ove mo paha aṋi?’
Maria ee ripura kutja omurumendu ngwi omutjevere wotjikunino, nokutja eye ngahino ongwa toora orutu rwaJesus. Okutja eye opa tjera ku ye: ‘Tje ri ove ngwe mu toora, ndji raera kutja we kemutwa pi.’ Nungwari, tjiri, omurumendu ngwi oJesus. Eye we rihwikikire orutu Maria ndwe hina aa zemburuka. Nungwari indu eye tje mu isana kena re, Maria wa zemburuka kutja oJesus. Eye wa tupuka na karaera kovahongewa na tja: ‘Ami mba munu Muhona!’
Kombunda meyuva otjingero, ovahongewa vevari ngunda ava ri mondjira okuyenda kotjirongo tjaEmaus, omurumendu worive wa uta okukayenda pu nawo. Ovahongewa va ri noruhoze tjinene mena rokutja Jesus wa zepewa. Nungwari owo ngunda amave kayenda, omurumendu ngwi we ve kahururira oviṋa ovingi okuza mOmbeibela mbye ve nyandisa omitima. Korusenina, owo tji va kakurama okurya, ovahongewa va zemburuka kutja omurumendu ngwi oJesus. Okuzambo Jesus wa zenga, nu ovahongewa vevari mba tjimanga va kayenda ondjira aihe okuyaruka ku Jerusalem okukaraera ovaapostele ohunga naye.
Ngunda imbi amavi tjitwa, Jesus wina we rimunikisa ku Petrus. Imba ovarwe va tjaterwa indu tji ve tji zuva. Okuzambo ovahongewa vevari mba va ya ku Jerusalem nave kahakaena novaapostele. Owo ve ve raera omuano Jesus mbwe rimunikisa ku wo ngunda ava ri mondjira. Nowo ngunda amave hungire ohunga notjiṋa hi, ape tjitwa otjiṋa otjihimise. Ove mo tjiwa kutja otjikeṋa?
Tara motjiperendero. Jesus we rimunikisa ku wo imbo metuwo, nandarire kutja omuvero wa ri awa patwa. Ovahongewa tjiri va ri nenyando! Indo kara ri eyuva ewa nao? Ove mo yenene okuvara ovikando avihe Jesus mbye rimunikisa kovahongewa ve? Ove wa vara ovikando vitano?
Omuapostele Tomas ka ri puna wo indu Jesus tje rimunikisa. Okutja ovahongewa ve mu raera nave tja: ‘Eṱe twa munu Muhona!’ Nungwari Tomas we ve raera kutja ma vanga okumuna Jesus omuini kutja ma kambure. Okutja, omayuva hambondatu kombunda yanao ovahongewa va ri pamwe rukwao metuwo nda paterwe, nu otjikando hi Tomas wa ri puna wo. Tjimanga, Jesus we rimunikisa imbo metuwo. Okutja mbo Tomas otja kambura.
