Ɛisa iḍher-ed i inelmaden-is
TAQSIṬ TIS 103
Ɛisa iḍher-ed i inelmaden-is
M’AKKEN i ṛuḥen Buṭrus d Yuḥenna seg uẓekka-nni anda ssersen lǧeţţa n Ɛisa, Meryem ur teddi ara yid-sen. Teqqim dinna weḥd-es, tebda teţru. Mbeɛd tmuqel ɣer daxel n uẓekka, twala snat n lmalayek, akken i t-neɣra di teqsiṭ-nni iɛeddan. Nnant-as: ‘Acuɣer i teţruḍ?’
Meryem terra-yasent: ‘Wwin Ssid-iw, yerna ur ẓriɣ ara saniɣer i t-rran.’ Mbeɛd tmuqel ssya wesya, dɣa twala yiwen wergaz. Yenna-yas: ‘Anwa akka i teţqellibeḍ?’
Meryem tɣil d abeḥḥar. Tenwa daɣen d neţţa balak i geddmen lǧeţţa n Ɛisa. Tenna-yas ihi: ‘Ma yella d kečč i t-iddmen, ini-yi-d ɣer wanda i t-tewwiḍ.’ Di tin n ṣṣeḥ, argaz-agi d Ɛisa. Meryem ur t-teɛqil ara axaṭer yesbeggen-ed iman-is s lǧeţţa nniḍen. Lameɛna, akken kan i ţ-iluɛa s yisem-is, teɛqel belli d Ɛisa. Dɣa tuzzel aţ-ţessiweḍ lexbaṛ i inelmaden. Tenna-yasen: ‘Ẓriɣ Ssid-nneɣ!’
Ass-nni, mi gɛedda kra n lweqt, sin inelmaden llan leḥḥun ɣer yiwet n taddart iţţusemman Amawes, mi d-iqerreb ɣur-sen yiwen wergaz. Inelmaden-agi ḥeznen mliḥ imi yemmut Ɛisa. Lameɛna deg webrid, argaz-nni yessefhem-asen aṭas n leḥwayeǧ ɣef Wedlis Iqedsen, dɣa ḥulfan i wulawen-nsen nnefsusin. Yuɣal, inelmaden-nni ḥebsen iwakken ad ččen. Imiren i ɛeqlen belli argaz-nni yeddan yid-sen d Ɛisa. Meɛna din din iɣab ɣef wallen-nsen! Sin inelmaden-nni uɣalen ihi s lemɣawla ɣer Yarucalim akken ad xebbṛen imceggɛen.
M’akken llan leḥḥun ɣer din, Ɛisa yesban-ed daɣen iman-is i Buṭrus. Mi slan inelmaden nniḍen s lexbaṛ-agi, ččuṛen wulawen-nsen d lfeṛḥ. Mbeɛd sin inelmaden-nni wwḍen ɣer Yarucalim, dɣa bdan ḥekkun i yemceggɛen amek i sen-d-iḍher Ɛisa deg webrid. Mazal-iten ţmeslayen, mi d-teḍra yiwet lḥaǧa yessewhamen. Teẓriḍ d acu-ţ?
Muqel ţţeswiṛa-yagi. Atan ibedd-ed Ɛisa deg yiwet n texxamt ɣas akken teɣleq tewwurt. Acḥal i feṛḥen inelmaden-is! Bla ccekk d ass aseɛdi. Tḥesbeḍ acḥal n tikkal i d-yeḍher Ɛisa i inelmaden-is? Xemsa i d-tufiḍ?
Amceggeɛ Ṭuma ur yelli ara yid-sen m’akken i sen-d-yeḍher Ɛisa. Inelmaden nnan-as ihi: ‘Neẓra Ssid-nneɣ!’ Ṭuma yerra-yasen: ‘D lmuḥal ad amneɣ annect-a siwa ma ẓrant-eţ wallen-iw.’ Mi ɛeddan tmanya wussan, inelmaden nnejmaɛen daɣen deg yiwet n texxamt iwumi ɣelqent tewwura. Tikkelt-a Ṭuma yella yid-sen. Taswiɛt kan, ibedd-asen-d Ɛisa di tlemmast n texxamt-nni. Tura, Ṭuma yumen.
Yuḥenna 20:11-29; Luqa 24:13-43.
