Ngewa ya 103: Nthĩnĩ wa Nyũmba Mbinge
ĨTINA wa Vetelo na Yoana kuma mbũanĩ vala mwĩĩ wa Yesũ ũnaĩ, Meli nĩwatiiwe e weka. Nake ambĩĩa kũĩa. Na ĩndĩ akumana na akunĩkĩla mbũanĩ, o tondũ twonie visanĩ ũla ũngĩ. Na nthĩnĩ oona alaĩka elĩ! Namo mamũkũlya: ‘Wĩĩw’a nĩ kyaũ?’
Na Meli asũngĩa: ‘Nũndũ nĩmatwaie Mwĩaĩi wakwa, na ndyĩsĩ vala mamwiie.’ Na ĩndĩ Meli eethyũũa na oona mũndũ. Na ũ mũndũ amũkũlya: ‘Wĩmantha ũũ?’
Meli oonaa mũndũ ũsu ta mũsũvĩi wa mũũnda, na ta we wosie mwĩĩ wa Yesũ. Kwoou amwĩa: ‘Ethĩwa nũe ũmumisye vaa, ndavya vala ũmwiie.’ Ĩndĩ, kwa w’o, mũndũ ũsu nĩ Yesũ. Oosete mwĩĩ Meli ũtatonya kũũmanya. Ĩndĩ yĩla Yesũ wamwĩtie kwa syĩtwa yake, Meli amũmanya. Nake asemba athi atavya amanyĩw’a: ‘Nĩnamwona Mwĩaĩi!’
Mũthenya ũsu ũnaendanga, amanyĩw’a elĩ maendete ndũanĩ ya Emaũ, mũndũ mũna nĩwookie aendany’a namo. Mo maĩ na kyeva mũno nũndũ Yesũ nũnooaiwe. Ĩndĩ o maendete nzĩanĩ, mũndũ ũsu amaelesya maũndũ maingĩ kuma Mbivilianĩ ala matumie mew’a nesa. Ĩtina vyũ, mathũmũa maye lĩu, amanyĩw’a asu mamanya kana mũndũ ũsu nĩ Yesũ. Na ĩndĩ Yesũ aeka kwoneka, na amanyĩw’a asu elĩ mathi na mĩtũkĩ nginya Yelusaleme makatavye atũmwa ĩũlũ wake.
O maũndũ asu maendee, Yesũ nĩwaumĩlĩĩile Vetelo. Ala angĩ meew’a ũu nĩmatanie. Namo ala amanyĩw’a elĩ mathi Yelusaleme na mamethĩa atũmwa. Na mamatavya ũndũ Yesũ ũmaumĩlĩĩile me nzĩanĩ. Na o kavinda kau maendee na kũelesya ũndũ ũsu, we nĩwĩsĩ nũndũ mwaũ wa ũsengy’a weekĩkie?
Kwasisya vaa visanĩ. Yesũ nĩwaumĩlile nyũmba nthĩnĩ, o na kau mũomo waĩ mũvinge. Amanyĩw’a matanie ta kĩ! Ũsu w’o ĩndĩ tyo mũthenya wa ũtanu? Kũvika yu we nũtonya kũtala mavinda ala Yesũ waumĩlĩĩile aatĩĩi make? Nĩmavikĩte atano?
Mũtũmwa Thoma ndaĩ vamwe namo yĩla Yesũ waumĩlile. Kwoou amanyĩw’a mamwĩa: ‘Nĩtwamwona Mwĩaĩi!’ Ĩndĩ Thoma asya no nginya we mwene amwone Yesũ mbee wa kũĩkĩĩa. Matukũ nyaanya ĩtina, amanyĩw’a maĩ vamwe ĩngĩ nyũmbanĩ mbinge, na ĩvinda yĩu Thoma aĩ vamwe namo. Na o vau kwa vau, Yesũ aumĩla vau nyũmbanĩ nthĩnĩ. Na Thoma aĩkĩĩa.
Yoana 20:11-29; Luka 24:13-43.
Makũlyo
- Meli amwĩie ata mũndũ ũla we wasũaanĩaa ta mũsũvĩi wa mũũnda, ĩndĩ nĩ kyaũ kyatumie amanya kwa w’o ũsu aĩ Yesũ?
- Kweekĩkie ata kwa amanyĩw’a elĩ ala maendete ndũanĩ ya Emaũ?
- Nũndũ mwaũ wa ũsengy’a weekĩkie yĩla amanyĩw’a asu elĩ mamatavasya atũmwa kana nĩmamwonie Yesũ?
- Yesũ aumĩlĩĩle aatĩĩi make mavinda meana?
- Thoma aisye ata eew’a kana amanyĩw’a nĩmamwonie Mwĩaĩi, ĩndĩ kweethĩiwe ata mĩthenya nyanya ĩtina?
Makũlyo ma kwongeleela
- Soma Yoana 20:11-29.
Ndeto sya Yesũ nthĩnĩ wa Yoana 20:23 syĩonany’a kana andũ nĩmanengetwe ũtonyi wa kũekea naĩ? Elesya. (Sav. 49:2, 7; Isa. 55:7; 1 Tim. 2:5, 6; 1 Yoa. 2:1, 2)
- Soma Luka 24:13-43.
Tũtonya kũmbany’a ngoo yitũ ata wĩthĩe nĩtonya kwĩtĩkĩla w’o wa Mbivilia kwa ũvũthũ? (Lk. 24:32, 33; Esa. 7:10; Mt. 5:3; Meko 16:14; Aevl. 5:11-14)
No Wendeewʼe Nĩ Ii
YESŨ NĨWE NZĨA, NĨWE W’O, NĨWE THAYŨ
Andũ Maana Maingĩ Nĩmamwonie Yesũ Mbee wa Vendekosito
Ĩtina wa kũthayũũkw’a na atielye mĩthenya mĩnini ambate ĩtunĩ, Yesũ nĩwatũngĩlĩĩile kũtavya amanyĩw’a kĩla makakwata na ũndũ makatũmĩa kĩndũ kĩu.
