NAQ laj Pedro ut laj Juan keʼelk chaq saʼ li muqlebʼaal li xMaria kikanaak chi yaabʼak xbʼaan naq inkʼaʼ kixtaw li Jesus. Tojaʼ naq li xMaria kiril wiibʼ li anjel chisaʼ li muqlebʼaal. Ebʼ li anjel keʼxye re: ‹Kʼaʼut yookat chi yaabʼak?›

Li xMaria kixye rehebʼ li anjel: ‹Maaʼani chik li Jesus ut inkʼaʼ ninnaw bʼar xeʼxkʼam!› Naq li xMaria kiʼilok chirix, jun li winq kixye re: ‹Ani nakaasikʼ?›

Li xMaria kixkʼoxla naq li winq aj ilol awimq, ut aʼan tana kikʼamok re li Jesus. Joʼkan naq kixye re: ‹Wiʼ laaʼat xatkʼamok re, ye we bʼar xaakʼe chaq›. Li winq aʼan li Jesus. Li xMaria inkʼaʼ chik kixnaw ru li Jesus xbʼaan naq moko juntaqʼeet ta chik li xtibʼel. Naq li winq kixye li xkʼabʼaʼ li xMaria, aran kixkʼe reetal naq aʼan li Jesus. Li xMaria xko saʼ aanil chi xyeebʼal rehebʼ li xtzolom: ‹Xwil ru li Jesus!›

Saʼ ajwiʼ li kutan aʼan wiibʼ li xtzolom li Jesus yookebʼ chi xik saʼ li kʼalebʼaal, Emaus, abʼan rahebʼ saʼ xchʼool xbʼaan naq kikamk li Jesus, tojaʼ naq jun li winq kiʼochbʼeenink rehebʼ. Abʼan naq li winq kiʼok chi aatinak chirix li Santil Hu ebʼ li xtzolom li Jesus keʼkʼojlaak xchʼool. Naq keʼhilank chi waʼak keʼxkʼe reetal naq li winq li yook chi ochbʼeenink rehebʼ, aʼan li Jesus. Tojaʼ naq sachamil chiruhebʼ. Naq keʼsutqʼiik Jerusalen keʼxye rehebʼ li apostol naq keʼril ru li Jesus.

Li Jesus kixkʼutbʼesi ribʼ ajwiʼ chiru laj Pedro. Naq ebʼ li xtzolom li Jesus keʼrabʼi aʼin keʼsahoʼk saʼ xchʼool. Li xwiibʼ chi tzolom li Jesus keʼwulak Jerusalen ut keʼxye rehebʼ li apostol naq saʼ bʼe keʼxtaw li Jesus. Ma nakaanaw kʼaru kikʼulmank naq yookebʼ xyeebʼal aʼin?

Li ochoch tzʼaptzʼo naq kutamil li Jesus chiruhebʼ. Kʼajoʼ naq keʼsahoʼk saʼ xchʼool ebʼ li xtzolom naq keʼril ru! Aʼin nakʼutunk saʼ li eetalil. Yaabʼasi li oobʼ sut naq li Jesus kixkʼut ribʼ?

Laj Tomas, li apostol, moko wank ta saʼ xyanqebʼ naq li Jesus kixkʼut ribʼ chiruhebʼ. Joʼkan naq ebʼ li xtzolom li Jesus keʼxye re laj Tomas: ‹Xqil ru li Jesus!› Abʼan laj Tomas inkʼaʼ kixpaabʼ, xbʼaan naq toj maajiʼ naril ru. Ak waqxaqibʼ kutan xyeebʼal aʼin, naq kixkʼut ribʼ wiʼ chik li Jesus chiruhebʼ. Toj aran kixpaabʼ laj Tomas naq yoʼyo li Jesus xbʼaan naq tzʼaptzʼookebʼ saʼ li ochoch naq kiwulak li Jesus.