HĨNDĨ ĩrĩa Petero na Johana moimire mbĩrĩra-inĩ harĩa mwĩrĩ wa Jesu waigĩtwo-rĩ, Mariamu aatigirũo wiki. Akĩambĩrĩria kũrĩra. Rĩu ningĩ akĩinamĩrĩra acũthĩrĩrie thĩinĩ wa mbĩrĩra, ta ũrĩa tũkuonete mbica-inĩ ya mũthia. Hĩndĩ ĩo akĩona araika erĩ! Makĩmũũria atĩrĩ: ‘Nĩ kĩĩ kĩratũma ũrĩre?’

Mariamu agĩcokia atĩrĩ: ‘Nĩ ũndũ nĩmarutĩte Mwathani wakwa, na ndiũĩ harĩa mamũigĩte.’ Mariamu eehũgũra akĩona mũndũ. Mũndũ ũcio akĩmũria atĩrĩ: ‘Nũũ ũcio ũracaria?’

Mariamu eeciragia atĩ mũndũ ũcio aarĩ mũrĩmi wa mũgũndũ, na ahota gũkorũo nĩwe weheretie mwĩrĩ wa Jesu. Kwoguo akĩmwĩra atĩrĩ: ‘Okorũo nĩwe ũmũrutĩte haha, njĩra harĩa ũmũigĩte.’ No kũna mũndũ ũcio aarĩ Jesu. Eehumbĩte mwĩrĩ Mariamu atangĩahotire kũmũkũũrana. No ĩndĩ rĩrĩa aamwĩtire rĩĩtwa rĩake, Mariamu akĩmenya ũyũ nĩ Jesu. Akĩhanyũka akĩĩra arutwo ake atĩrĩ: ‘Nĩ nyonete Mwathani!’

Thutha-inĩ mũthenya oro ũcio, hĩndĩ ĩrĩa arutwo erĩ maathiaga itũũra-inĩ rĩa Emau-rĩ, mũndũ akĩmathengerera agĩtwarana nao. Arutwo acio maarĩ na kĩeha mũno tondũ Jesu nĩ aarĩkĩtie kũũragwo. O ũrĩa maathiangaga na mbere, mũndũ ũcio akĩmataarĩria maũndũ maingĩ kuuma Biblia marĩa maatũmire macokwo nĩ thayũ. Mũthia-inĩ, rĩrĩa maatithirie marĩe irio, arutwo acio magĩtaũkĩrũo atĩ mũndũ ũcio aarĩ Jesu. O rĩmwe Jesu akĩbuĩria, nao arutwo acio erĩ maacokire na ihenya merekeire Jerusalemu nĩguo makamenyithie atũmwo ũhoro ũcio.

Rĩrĩa ũndũ ũcio waathiaga na mbere, Jesu akiumĩrĩra Petero. Nao acio angĩ magĩcanjamũka nĩũndũ wa kũigua ũhoro ũcio. Rĩu arutwo acio erĩ magĩthiĩ Jerusalemu na magĩkora atũmwo. Magĩkĩmera ũrĩa o nao moimĩrĩirũo nĩ Jesu me njĩra-inĩ. Matanarĩkia kũmeera ũhoro ũcio-rĩ, nĩ ũũĩ magegania marĩa monekire?

Ta rora mbica ĩno. Jesu aamoimĩrĩire gatagatĩ-inĩ kao, o na gũtuĩka mũrango waarĩ mũhinge. Kaĩ arutwo nĩ maagĩkenireĩ! Na githĩ ũcio ndwakĩrĩ mũthenya wa gũcanjamũra mũno? Wahota gũtara nĩ mahinda maigana Jesu rĩu arĩkĩtie kuumĩrĩra arũmĩrĩri ake? Ũratara maita matano?

Toma ũrĩa waarĩ mũtũmwo ndaarĩ hamwe nao Jesu akĩmaumĩrĩra. Kwoguo arutwo makĩmwĩra atĩrĩ: ‘Nĩ twonete Mwathani!’ No Toma akiuga no mũhaka angĩamuonire we mwene nĩguo etĩkie nĩwe. No ningĩ, mĩthenya ĩnana thutha ũcio arutwo maarĩ hamwe rĩngĩ nyũmba hinge, na ihinda rĩrĩ Toma aarĩ hamwe nao. Oro rĩmwe, Jesu akĩmaumĩrĩra thĩinĩ wa nyũmba. Hĩndĩ ĩyo nĩrĩo Toma etĩkirie.