PHETELE ni Nzuá kia xisa o mbila mua kexile o kimbi kia Jezú, Madiia ua xala ubheka uê. Muéne ua mateka kudila. Kienhiki, ua tale moxi a mbila, muéne ua mono anju jiiadi! Ene a mu ibhula: ‘Ua mu didila mukonda diahi?’

Madiia ua tambuijila: ‘Ene ambata o Ngana iami, ki ngejiia se a mu ambata kuebhi.’ Kienhiki, Madiia ua tale bhu mbandu, inga u mona diiala. Muéne ua mu ibhula: ‘Ua mu sota nanhi?’

Madiia ua fikile kuma o mukalakadi ua jaludim, muéne uambatele o kimbi kia Jezú. Kienhiki muéne uixi: ‘Se eie ua mu ambata, ngi tangele kuebhi ku ua mu ambata.’ Maji mu kidi o diiala diexile Jezú. Muéne ua difuile kiéngi, mukonda dia kiki Madiia ka tenene ku mu lembalala. Maji kioso kia mu ixana mu dijina diê, Madiia ua mono kuila Jezú. Muéne ua tundu ni ku lenga mu tangela o maxibulu: ‘O Ngana nga mu mono!’

Mu ngoloxi, kioso o maxibulu aiadi akexile múia mu sanzala a ixana Emaú, saí diiala ua a zukama. Maji o maxibulu a luualele kiavulu mukonda Jezú a mu jibhile. Maji kioso ene kia kexile mu kuenda mu njila, kua moneka diiala, o diiala ua a tangela ima iavulu iala mu Bibidia, íii ia a bhangesa ku divua kiambote. Mu kusukáko, kioso kia nhoha phala kudia, o maxibulu a di lembalala kuma o diiala, Jezú. Kienhiki Jezú ua jimbidila, o maxibulu aiadi a vutuka ni lusolo mu Jeluzaleme phala ku tangela o jipoxolo ja kamúkua ia lungu ni muéne.

Mu kithangana kieniókio, Jezú ua monekena ué kua Phetele. A kamúkua a sasumukine kia kívu. Kienhiki, o maxibulu aiadi endele mu Jeluzaleme a sange o jipoxolo. Ene a tangela kuma Jezú ua a monekena mu njila. Kioso kia kexile mu zuela hanji maka a lungu ni íii, uejiia se kima kiahi kia bhiti?

Tala o fikula. Jezú ua a monekena mu dixilu, sumbala ni dibhitu dio jike. O maxibulu a sangulukile kiavulu! Ki kiexile kizuua kia madiuanu? Utena ku kondala veji jikuxi Jezú ua monekena ku akaiedi’ê? Ua kondala veji jitanu?

O poxolo Tomé ka kexile-bhu kioso Jezú kia a monekena. Kienhiki, o maxibulu a mu tangela: ‘Tua mono Ngana!’ Maji Tomé uixi kuma , muéne ua-nda xikana ngó kioso kia-nda mona Jezú. Mu ku bhita dinake dia izuua, o maxibulu akexile dingi mu dixilu dio jike, ni Tomé kumoxi. Mu kithangana kieniókio, Jezú ua a monekena muene mu dixilu dio jike. Kienhiki, Tomé ua xikina.