PETELO ne Yoano byo bafumine ku kilende kwajinga mubiji wa kwa Yesu, Maliya washajile konkakwa bunke. Watendekele kujila. Kepo abandamine ne kusumbila mu kilende, byonka byo twamona pa kipikichala kyafumako. Mu kino kilende wamwenemo bamalaika babiji! Bamwipwizhe’mba: ‘Mujila ka?’

Maliya wakumbwile’mba: ‘Njila mambo bamufumyapo Nkambo yami, ne amiwa kechi nayuka ko bamutula ne.’ Maliya byo aambile bino byambo wafutulukile ne kumona wamwene muntu. Uno muntu wamwipwizhe’mba: ‘Mukeba ñanyi?’

Maliya walangulukile’mba awa muntu ye walaminenga bujimi, kabiji amba kampe ye wasenda mubiji wa kwa Yesu. Kepo aipwizhe’mba: ‘Mwane, inge yenu mwamulupula muno, mbulai ko mwamutula, amiwa nkamusende.’ Bino uno muntu wajinga Yesu. Wajinga na mubiji ye abujile kuyuka Maliya. Pano byo amwichile pa jizhina janji, Maliya po po amuyukile’mba Yesu. Wayile lubilo na kukabula baana ba bwanga amba: ‘Namumona Nkambo!’

Kimye kikwabo mu jonkaja juba, baana ba bwanga babiji byo bayilenga mu muzhi wa Emasa, muntu umo wayilenga nabo. Baana ba bwanga bapopomejilwe bingi mambo Yesu bamwipayile. Pano byo baendelenga, uno muntu wibalondolwejile bintu byavula bingi kufuma mu Baibolo bibalengejile kumvwa bulongo. Kyapeleleko, byo baimene amba baje kajo, po po bamuyukile uno muntu amba Yesu. Ponkapo Yesu wazhimañene, kabiji bano baana ba bwanga babiji bapelawizhizhe kuya ku Yelusalema na kubula batumwa pe aye.

Bino byonse byo byakyubiwenga, Yesu wamwekele ne kwi Petelo. Bakwabo nabo baumvwine bingi bulongo pa kumvwa kino. Kepo bano baana ba bwanga babiji bayile ku Yelusalema na kumonañana na batumwa. Byo bafikile bebabujile pe Yesu byo amwekele kwi abo mu jishinda. Byo bakyambilenga bino, abya wayuka kintu kya kukumya kyamwekele nyi?

Akimona pa kipikichala. Yesu wamwekele kwi abo mu kyokya kibamba, nangwa kya kuba kinzhilo kyajinga kya kushinka. Baana ba bwanga byo batemenwepo! Nanchi jino kechi jajinga juba ja lusekelo nenyi? Abya wakonsha kuyuka bimye byo amwekele Yesu ku baana banji ba bwanga nyi? Abya wabala bimye bitanu nyi?

Mutumwa Tomase kechi wajingapo kimye kyamwekele Yesu ne. Onkao mambo, baana ba bwanga bakwabo bamubujile’mba: ‘Twamumona Nkambo!’ Bino Tomase waambile’mba, usakwitabilatu kana aye mwine amumone Yesu. Byo papichile moba atanu na asatu, baana ba bwanga bajinga pamo bonse mu kibamba saka bashinkako, kabiji Tomase naye wajingapo. Ponkapotu Yesu wamwekele kwi abo monkamwa mu kibamba. Tomase po po aishile kwitaba.