ເຂົ້າໄປໃນຫ້ອງທີ່ໃສ່ກອນໄວ້
ບົດ 103
ເຂົ້າໄປໃນຫ້ອງທີ່ໃສ່ກອນໄວ້
ຫຼັງຈາກເປໂຕແລະໂຍຮັນໄປຈາກອຸມົງ ມາລີຍັງຢູ່ທີ່ນັ້ນແຕ່ຜູ້ດຽວ. ນາງເລີ່ມຮ້ອງໄຫ້. ຄັນແລ້ວກໍ່ກົ້ມຕົວເບິ່ງຂ້າງໃນອຸມົງ ດັ່ງທີ່ເຮົາໄດ້ເຫັນໃນຮູບກ່ອນນີ້. ນາງເຫັນທູດສະຫວັນສອງອົງຢູ່ໃນອຸມົງ! ທູດສະຫວັນຖາມນາງວ່າ: ‘ເປັນຫຍັງເຈົ້າຮ້ອງໄຫ້?’
ມາລີຕອບວ່າ: ‘ເຂົາເອົາອົງພະຜູ້ເປັນເຈົ້າຂອງຂ້າພະເຈົ້າໄປ ແລະຂ້າພະເຈົ້າບໍ່ຮູ້ວ່າເຂົາເອົາພະອົງໄປໄວ້ໃສ.’ ຄັນແລ້ວມາລີຫັນກັບແລະເຫັນຊາຍຄົນນຶ່ງ. ຊາຍຜູ້ນັ້ນຖາມນາງວ່າ: ‘ເຈົ້າຊອກຫາຜູ້ໃດ?’
ມາລີຄິດວ່າຊາຍຄົນນັ້ນເປັນຄົນເຮັດສວນ ແລະເຂົາອາດເປັນຜູ້ທີ່ເອົາສົບຂອງພະເຍຊູໄປ. ດັ່ງນັ້ນມາລີເວົ້າວ່າ: ‘ຖ້າທ່ານໄດ້ເອົາສົບຂອງພະອົງໄປ ຂໍບອກຂ້າພະເຈົ້າໃຫ້ຮູ້ວ່າທ່ານເອົາພະອົງໄປໄວ້ໃສ.’ ແຕ່ແທ້ຈິງແລ້ວ ຊາຍຜູ້ນີ້ຄືພະເຍຊູ. ພະອົງແປງຮ່າງກາຍທີ່ມາລີບໍ່ຮູ້ຈັກ. ແຕ່ເມື່ອພະອົງເອີ້ນຊື່ຂອງນາງ ມາລີກໍ່ຮູ້ວ່າຊາຍຜູ້ນີ້ຄືພະເຍຊູ. ນາງຈຶ່ງຟ້າວແລ່ນໄປບອກພວກສາວົກວ່າ: ‘ຂ້າພະເຈົ້າໄດ້ເຫັນອົງພະຜູ້ເປັນເຈົ້າ!’
ຕໍ່ມາໃນມື້ນັ້ນເອງຂະນະທີ່ສາວົກສອງຄົນພວມຍ່າງໄປຫມູ່ບ້ານເອມາອຶດ ມີຊາຍຄົນນຶ່ງຮ່ວມເດີນທາງໄປກັບເຂົາ. ສາວົກສອງຄົນນັ້ນເສົ້າໃຈຫຼາຍ ເພາະພະເຍຊູຖືກຂ້າ. ແຕ່ລະຫວ່າງທີ່ຍ່າງໄປດ້ວຍກັນ ຊາຍຄົນນັ້ນອະທິບາຍຫຼາຍສິ່ງຈາກພະຄຳພີຊຶ່ງເຮັດໃຫ້ເຂົາຮູ້ສຶກດີຂຶ້ນ. ໃນທີ່ສຸດເມື່ອເຂົາຢຸດກິນອາຫານດ້ວຍກັນ ສາວົກທັງສອງກໍ່ນຶກຂຶ້ນໄດ້ວ່າຊາຍຜູ້ນີ້ຄືພະເຍຊູ. ແລ້ວພະເຍຊູຫາຍຕົວໄປ ແລະສາວົກສອງຄົນນັ້ນຮີບກັບເຢຣຶຊາເລມທັນທີເພື່ອບອກໃຫ້ພວກອັກຄະສາວົກຮູ້ກ່ຽວກັບພະອົງ.
ໃນລະຫວ່າງນັ້ນ ພະເຍຊູໄດ້ປາກົດແກ່ເປໂຕດ້ວຍ. ຄົນອື່ນໆເມື່ອໄດ້ຍິນດັ່ງນີ້ຮູ້ສຶກຕື່ນເຕັ້ນ. ແລ້ວສາວົກສອງຄົນນັ້ນກໍ່ເຂົ້າໄປເຢຣຶຊາເລມແລະພົບກັບພວກອັກຄະສາວົກ. ເຂົາເລົ່າໃຫ້ຟັງວ່າພະເຍຊູໄດ້ປາກົດຕົວແກ່ເຂົາຕາມທາງດ້ວຍ. ແລະພໍດີຂະນະທີ່ພວມເລົ່າຢູ່ນັ້ນ ເຈົ້າຮູ້ບໍວ່າມີສິ່ງໜ້າອັດສະຈັນເກີດຂຶ້ນ?
ເບິ່ງທີ່ຮູບນີ້ເດີ. ພະເຍຊູເຂົ້າມາປາກົດຕົວໃນຫ້ອງແມ່ນວ່າທີ່ປະຕູໃສ່ກອນໄວ້ແລ້ວ. ເຫຼົ່າສາວົກຕ່າງກໍ່ເບີກບານຍິນດີແທ້ໆ! ເປັນມື້ທີ່ໜ້າຕື່ນເຕັ້ນອີ່ຫຼີອີ່ຫຼໍແມ່ນບໍ? ພະເຍຊູມາປາກົດຕົວແກ່ເຫຼົ່າສາວົກຂອງພະອົງໄດ້ຈັກເທື່ອແລ້ວ? ເຈົ້ານັບໄດ້ຫ້າເທື່ອແມ່ນບໍ?
ອັກຄະສາວົກໂທມາບໍ່ໄດ້ຢູ່ກັບພວກເຂົາເມື່ອພະເຍຊູມາປາກົດ. ດັ່ງນັ້ນພວກສາວົກຈຶ່ງບອກໂທມາວ່າ: ‘ເຮົາໄດ້ເຫັນອົງພະຜູ້ເປັນເຈົ້າ!’ ແຕ່ໂທມາເວົ້າວ່າເຂົາຈະຕ້ອງໄດ້ເຫັນພະເຍຊູດ້ວຍຕົນເອງກ່ອນເຂົາຈະເຊື່ອ. ເອົາລະ ແປດມື້ຕໍ່ມາພວກສາວົກຊຸມນຸມກັນອີກໃນຫ້ອງຊຶ່ງໃສ່ກອນໄວ້ ແລະເທື່ອນີ້ໂທມາຢູ່ດ້ວຍ. ພະເຍຊູປາກົດຕົວໃນຫ້ອງຊຸມນຸມນັ້ນ. ດຽວນີ້ໂທມາເຊື່ອ.
ໂຍຮັນ 20:11-29; ລຶກາ 24:13-43.