Chihande 103

MuZuvo Yakusoka Chijilo

OMU vaPetulu naYowano vanafumu kuchimbumbe vahakile mujimba waYesu, Maliya himwasalako uka wenyi. Himwaputuka kulila. Kaha himwanongama nakutala muchimbumbe, nge muze twamonanga hamuvwimbimbi uli kunyima. Mukachi hikumonamo vangelo vavali! Hinavamuhula ngwavo: ‘Unakulila ika?’

Maliya ngwenyi: ‘Mwomwo vanamufumisamo lyehi Mwata wami, kaha kangwatachikijile okwo vanamuhakeko.’ Maliya hakwalumuka nakutala munyima, himwamona mutu. Ikiye mwahula Maliya ngwenyi: ‘Uli nakutonda iya?’

Maliya ngwenyi pamo lunga kana ikiye muka-kulama milemba, kaha ikiye hamwe nambate mujimba waYesu. Shikaho ngwenyi: ‘Kachi nge yove unamutwale kweka, ngulweze okwo unamuhake.’ Oloze, ou lunga ikiye Yesu. Navwale mujimba uze Maliya katachikijileko. Omu namusanyika Maliya halijina, himwejiva jino ngwenyi ikiye Yesu. Hikuya nakulweza tumbaji ngwenyi: ‘Ngunamumono lyehi Mwata!’

Halikumbi vene eli, omwo tumbaji vavali vali nakuya kuEmau, lunga umwe himwatambuka navo. Tumbaji vanakunyengetela mwomwo Yesu vanamujihi. Jino omu vali nakutambuka, ou lunga himwavalumbunwina vyuma vyavivulu vyamuMbimbiliya vyakuvasuulwisa. Kutwala muze, hakutwama ngwavo valyenga, tumbaji hinavamwijiva ngwavo ou lunga ikiye Yesu. Jino Yesu hilelanganyi, kaha tumbaji vavali ava washiwashi hikukinduluka cheka kuYelusalema vakambulile vaposetolo vyaikiye.

Shimbu vinakulingiwa ngocho, Yesu himwalisolola kuli Petulu. Vakwavo vanawahilila hakwivwa chuma kana. Jino tumbaji vavali ava hikuya kuYelusalema nakuwana vaposetolo. Hinavavambulila omwo Yesu alisololanga nawa kuli vakivo mujila. Kaha shimbu vali nakwambulula mujimbu kana, unejiva chuma chakukomwesa nachisoloka?

Tala hamuvwimbimbi. Yesu hilwi mukachi kavo muzuvo, numba tuhu kuchijilo kwakusoka. Vaposetolo ocho kuwahilila kana! Uno kalyeshi likumbi lyakwivwa chisekeko nyi? Nauhasa kulava mapapa nalisolola lyehi Yesu kuli vaka-kumukavangiza tahi? Unalave ngwove katanu nyi?

Kaposetolo Tomase keshi navoko hashimbu nalisolola Yesu. Shikaho tumbaji hinavamulweza ngwavo: ‘Tunamumono Mwata!’ Oloze Tomase ngwenyi kuvanga namumono numba etave. Chamwaza, omu hanahichi makumbi atanu naatatu tumbaji vali cheka muzuvo yakusoka chijilo, naTomase jino hali. Kukasumuka, Yesu hilwi mukachi kavo, muzuvo. Tomase jino himwetava.

Yowano 20:11-29; Luka 24:13-43.