SHO Petrus naJohannes ya thigi po ombila moka mwa li olutu lwaJesus, Maria ota kala po oye awike. Ye ota tameke ta lili. Opo nduno ota petama e to ontamene mombila, ngaashi twa mono mefano lya tetekele. Moka ye ota mono aayengeli yaali! Yo otaye mu pula: ‘Omolwashike to lili?’

Maria ota yamukula: ‘Yo oya kutha mo Omuwa gwandje, nokandi shi wo mpoka yo ye mu tula.’ Opo nduno Maria ota punguluka nota mono omulumentu. Ye ote mu pula: ‘Oto kongo lye?’

Maria ota dhiladhila kutya omulumentu oye omukeeleli gweyana, nonokutya sikulimwe oye a kutha mo olutu lwaJesus. Ano ye ota ti: ‘Ngele ongoye we mu kutha mo, lombwela ndje mpoka we mu tula.’ Ihe omulumentu muushili wo wene oye Jesus. Ye okwa kutha olutu ndoka Maria itaa dhimbulula. Ihe sho ye e mu tumbula kedhina, Maria ota tseya kutya oye Jesus. Ye ota matuka nota hokololele aalongwa: ‘Ngame onda mona Omuwa!’

Konima yesiku tuu ndyoka, manga aalongwa yaali taa yi komukunda Emaus, omulumentu ota tameke okweenda pamwe nayo. Aalongwa oya yemata noonkondo molwashoka Jesus a dhipagwa. Ihe manga taye ende, omulumentu ota yelitha iinima oyindji yomOmbimbeli, notashi ya uvitha nawa. Lwahugunina, sho taa li uulalelo, aalongwa otaa dhimbulukwa kutya omulumentu nguka oJesus. Opo nduno Jesus ota nena po, naalongwa mbano yaali otaa shuna mbala kuJerusalem oku ka hokololela aayapostoli.

Opo tuu mpoka Jesus oti ihololele wo Petrus. Yalwe oya nyanyukwa sho taye shi uvu. Opo nduno aalongwa mbaka yaali otaa yi kuJerusalem notaa mono aayapostoli. Yo otaye ya hokololele nkene Jesus e yi ihololele mondjila. Mbela ngoye owa tseya ngaa kutya oshinima oshikumithi shini po sha ningwa po manga yo yi ipyakidhila natango oku shi ya hokololela?

Tala kefano. Jesus ota holoka lelalela mpoka mondjugo, nokuli nando omweelo ogwa patwa. Alikana aalongwa oya nyanyukwa ngiini! Esiku etuntulimwenyo ngiini! Oto vulu mbela okuyalula kutya iikando ingapi nale Jesus i ihololele aalongwa ye? Oto mono wo itano?

Omuyapostoli Tomas ka li pamwe nayo sho Jesus ta holoka. Ano aalongwa otaa ti kuye: ‘Tse otwa mona Omuwa!’ Ihe Tomas ota ti ye okwa hala a mone Jesus ye mwene manga ye inee shi itaala. Konima yomasiku gahetatu aalongwa oye li ishewe mondjugo ya patwa, noshikando shino Tomas opo e li. Ombadhilila Jesus ota holoka lelalela mpoka mondjugo. Ngashingeyi Tomas okwi itaala.