HE MOLE e ō a Peteru mo Ioane he tukuaga ne toka ai e tino ha Iesu, ne toe hifo tokotaha a Maria. Ne kamata a ia ke tagi. Ti tukutuku hifo a ia mo e onoono ki loto he tukuaga, tuga ne kitia e tautolu he fakatino kua mole. Ne kitia e ia ua e agelu i ai! Ne hūhū a laua ki a ia: ‘Ko e tagi a koe he ha?’

Ne tali e Maria: ‘Kua uta tuai e lautolu e haku Iki, ti nakai iloa e au kua tuku e lautolu a ia i fe.’ Ti fuluhi a Maria mo e kitia e tagata taane. Ne hūhū a ia ki a Maria: ‘Ko hai haau ne kumi?’

Ne manatu a Maria ko e tagata gahua katene, ti liga ko ia ne uta e tino ha Iesu. Ti pehē a ia: ‘Kaeke kua uta e koe a ia, tala mai ki a au kua toka e koe a ia i fe.’ Ka e mooli, ko e tagata nei ko Iesu. Kua nakai mailoga e Maria e tino foou haana mogonei. Ka e he magaaho ne hea e ia e higoa haana, ne iloa e Maria ko Iesu anei. Ne poi atu a ia mo e tala age ke he tau tutaki: ‘Kua kitia tuai e au e Iki!’

He taha vala he aho ia, tokoua e tutaki hane o atu ke he maaga ko Emau, ti taha e tagata ne fakalataha atu ki a laua. Kua momoko lahi e tau tutaki ha kua tamate a Iesu. Ka e he ō a lautolu, ne fakamaama he tagata nei e tau mena loga mai he Tohi Tapu ti kua mafanatia a laua. Fakahiku ai, he mogo ne aafe a lautolu ke kai, ne mailoga he tau tutaki ko Iesu e tagata nei. Ka kua galo a Iesu, ti liliu fakaave e tau tutaki tokoua nei ki Ierusalema ke tala age ke he tau aposetolo hagaao ki a ia.

He tutupu e tau mena ia, ne fakakite foki e Iesu a ia ki a Peteru. Ne fiafia e falu he mogo ne logona e lautolu e mena nei. Ti o atu e tau aposetolo tokoua nei ki Ierusalema ke kumi he tau aposetolo. Ne tala age e laua e puhala ne fakakite mai a Iesu ki a laua he puhalatū. Ka e he tala age e laua e tau mena nei, iloa nakai e koe e mena ofoofogia ne tupu?

Onoono ke he fakatino. Ne hoko mai ai a Iesu ki loto he poko, pete ni ne fakamau e gutuhala. Ko e fiafia ha ia he tau tutaki! Ne fakalagalaga lahi e aho ia, pihia nakai? Maeke nakai ia koe ke totou kua lagafiha mogonei e fakakite atu a Iesu ke he tau tutaki haana? Lagalima nakai he totou e koe?

Ne nakai nofo ai e aposetolo ko Toma mo lautolu he mogo ne hoko mai a Iesu. Ti tala age e tau aposetolo ki a ia: ‘Kua kitia tuai e mautolu e Iki!’ Ka kua pehē a Toma kua lata ni a ia ke kitia a Iesu ato talitonu ai a ia. He valu e aho he mole kua liu fakalataha e tau tutaki ke he poko ne loka, ti ko e mogonei ko Toma foki i ai mo lautolu. Ne amanaki ni a Iesu ti kua haia foki i loto he poko. Ne kua talitonu a Toma mogonei.