Ekitebyo 103

Omu Kishengye Kikiingire

BWANYIMA ya Petero na Yohaana kuruga aha kituuro ahu omutumbi gwa Yesu gwabaire guri, Mariamu atsigarayo wenka. Atandika kurira. Bwanyima ainama aringuriza omu kituuro omunda nk’oku tureebire omu kishushani eky’enyima. Omwo areebamu baamaraika babiri! Bamubuuza bati: ‘Noorizibwa ki?’

Mariamu agarukamu ati: ‘Batwire Mukama wangye, kandi tindikumanya ei bamutaire.’ Mariamu ahinduka kandi areeba omushaija. Omushaija amubuuza ati: ‘N’oha ou orikusherura?’

Mariamu ateekateeka ngu omushaija ogu n’omuhingi, kandi ngu naabaasa kuba niwe atwire omutumbi gwa Yesu. N’ahabw’ekyo agira ati: ‘Ku oraabe niiwe omutwire, ngambira ei omutaire.’ Kwonka buzimazima ogu mushaija ni Yesu. Ajwaire omubiri ogu Mariamu atarikwetegyereza. Kwonka ku amweta omu iziina rye, Mariamu amanya ngu ni Yesu. Airuka kandi agambira abeegi ati: ‘Naareeba Mukama waitu!’

Bwanyima omuri eryo izooba, abeegi babiri ku baabaire nibagyenda omu kyaro ekirikwetwa Emau, omushaija abahika agyenda nabo. Abeegi baine enaku ahabw’okuba Yesu aitsirwe. Kwonka ku baba nibagyenda, omushaija abashobororera ebintu bingi kuruga omuri Baibuli ebyabareetaire kugira obugwa-gye. Aha muheru, ku beemerera kutunga eky’okurya, abeegi beetegyereza ngu omushaija ogu ni Yesu. Aho Yesu abura, kandi abeegi aba babiri bagaruka Yerusaalemu okugambira entumwa ebirikumukwataho.

Ebyo bikiri aho, Yesu abonekyera na Petero. Abandi ku bakihurira, bashemererwa munonga. Bwanyima abeegi aba babiri baza Yerusaalemu okusherura entumwa. Babagambira oku Yesu ababonekyeire omu muhanda. Ku baba nibaganiira ahari eki, noomanya eky’okutangaaza ekyabaireho?

Reeba eki kishushani. Yesu ataaha omu kishengye abeeyoreka n’obu orwigi rwabaire rukingire. Abeegi ka baashemereirwe! Eryo t’eizooba ririkushemeza? Noobaasa kubara emirundi ei Yesu yaahitsya arikweyoreka abakuratsi be? Waabara emirundi etaano?

Tomasi entumwa tari nabo obu Yesu ababonekyera. N’ahabw’ekyo abeegi bamugambira bati: ‘Twareeba Mukama waitu!’ Kwonka Tomasi agira ngu aine kumwereebera we wenka atakaikiriize. Mbwenu, bwanyima y’ebiro munaana, abeegi bakaba bari hamwe omu kishengye kikiingire, kandi aha murundi ogu Tomasi ari nabo. Omu kaanya ako, Yesu areebeka omu kishengye ekyo. Mbwenuho Tomasi aikiriza.

Yohaana 20:11-29; Luka 24:13-43.