Relato 103: Den un Sala Será
DESPUES ku Pedro i Juan a bandoná e graf kaminda e kurpa di Hesus tabata, Maria a keda ei su so. El a kuminsá yora. Anto el a sak i a wak den e graf, manera nos a mira riba e plachi promé. El a mira dos angel eiden! Nan a puntr’é: ‘Pakiko bo ta yora?’
Maria a bisa: ‘Nan a hiba mi Señor i mi no sa unda nan a pon’é.’ Despues Maria a drei i a mira un hòmber. E hòmber a puntra Maria: ‘Ken bo ta buska?’
Maria a pensa ku e hòmber tabata e hardinero i ku ta e por a bai ku e kurpa di Hesus. P’esei el a bisa: ‘Si bo a bai kuné, bisa mi unda bo a pon’é.’ Pero e hòmber tabata Hesus mes. El a bisti un kurpa ku Maria no a rekonosé. Pero ora Hesus a yama Maria na su nòmber, Maria a haña sa ku ta Hesus. El a kore bai bisa e disipelnan: ‘Mi a mira Señor!’
Mas lat durante dia, ora dos disipel tabata kana pa bai n’e pueblo Emaus, un hòmber a djòin nan. E disipelnan tabata masha tristu debí n’e morto di Hesus. Pero riba kaminda e hòmber a splika nan hopi kos di Beibel ku a pone nan sinti mihó. Finalmente, ora nan a sinta pa kome, e disipelnan a haña sa ku e hòmber ta Hesus. Anto Hesus a disparsé i e dos disipelnan a bai bèk lihé te na Yerusalèm pa bisa e apòstelnan di dje.
Durante tur esei, Hesus a aparesé na Pedro tambe. E otronan a keda emoshoná ora nan a tende esei. Anto e dos disipelnan a yega Yerusalèm i haña e apòstelnan. Nan a bisa e apòstelnan kon Hesus a aparesé na nan tambe riba kaminda. I nèt durante e kòmbersashon, bo sa ki kos asombroso a sosodé?
Wak e plachi. Hesus a aparesé ei mes den e sala, ounke e porta tabata será. Ki felis e disipelnan a keda! Ki un okashon emoshonante! Bo sa kuantu biaha kaba Hesus a aparesé na su siguidónan? Bo a konta sinku bes?
Apòstel Tomas no tabata ku nan ora Hesus a aparesé. P’esei e disipelnan a bis’é: ‘Nos a mira Señor!’ Pero Tomas a bisa ku e mes tin ku mira Hesus pa e kere. Wèl, despues di ocho dia e disipelnan tabata huntu atrobe den un sala será i e biaha aki Tomas tambe tabata huntu ku nan. Diripiente Hesus a aparesé den e sala. Awor sí Tomas a kere.
Juan 20:11-29; Lukas 24:13-43.
Pregunta
- Kiko Maria a bisa un hòmber ku el a mira pa e hardinero, pero kiko a yud’é realisá ku en realidat tabata Hesus?
- Kiko a sosodé ku dos disipel ku tabata kana bai e pueblo Emaus?
- Ki kos asombroso a sosodé ora e dos disipelnan a bisa e apòstelnan ku nan a mira Hesus?
- Kuantu biaha Hesus a aparesé na su siguidónan?
- Kiko Tomas a bisa ora el a tende ku e disipelnan a mira Señor, pero kiko a sosodé ocho dia despues?
Preguntanan adishonal
- Lesa Juan 20:11-29.
Loke Hesus tabata kier men na Juan 20:23 ta ku hende tin outoridat pa pordoná pika? Splika. (Sal. 49:2, 7; Isa. 55:7; 1 Tim. 2:5, 6; 1 Juan 2:1, 2)
- Lesa Lukas 24:13-43.
Kon nos por prepará nos kurason pa e ta reseptivo na bèrdatnan di Beibel? (Luk. 24:32, 33; Esd. 7:10; Mat. 5:3; Echo. 16:14; Heb. 5:11-14)
Otro Artíkulo Interesante
HESUS—E KAMINDA, E BÈRDAT I E BIDA
Sientos di Hende A Mira Hesus Promé ku Pentekòste
Durante e periodo despues di su resurekshon i promé ku el a bai shelu, bes tras bes Hesus a bisa su disipelnan kiko nan lo a haña i kon nan lo mester a usa esaki.
