BIHAEN Peter and John lusim tomb wea body bilong Jesus stap bifor, Mary hem stap seleva. Hem start for krae. Then hem luk go insaed long tomb, olsem iumi lukim long piksa long story bifor diswan. Hem lukim tufala angel! Olketa askem hem: ‘Why nao iu krae?’

Mary hem sei olsem: ‘Olketa tekem finis Lord bilong mi, and mi no savve wea nao olketa putim hem.’ Then Mary tan raon and lukim wanfala man. Man hia askem hem: ‘Hu nao iu lukaotem?’

Mary tingse man hia hem man wea lukaftarem garden, and maet hem nao tekem body bilong Jesus. So hem sei: ‘Sapos iu tekem hem, talem mi wea nao iu putim hem.’ Bat, really, disfala man hem Jesus. Hem garem body wea Mary no luksavve long hem. Bat taem hem kolem nem bilong hem, Mary savve diswan hem Jesus nao. Hem ran go long olketa disaepol and sei: ‘Mi lukim Lord finis!’

Bihaen, long datfala sem day, taem tufala disaepol wakabaot go long vilij wea olketa kolem Em·maʹus, wanfala man hem gogo witim olketa. Tufala disaepol hia sorre tumas from Jesus hem dae finis. Bat taem olketa wakabaot go, man hia hem talem plande samting from Bible wea mekem olketa feel gud. Gogo, taem olketa rest lelebet for kaikai, tufala disaepol luksavve disfala man hem Jesus nao. Then Jesus hem go, and tufala disaepol hia kwiktaem for go bak moa long Jerusalem for talem olketa aposol abaotem hem.

Taem diswan gohed, Jesus showim hemseleva long Peter tu. Olketa narawan hapi tumas taem olketa herem diswan. Then tufala disaepol hia go long Jerusalem for faendem olketa aposol. Olketa talem olketa hao Jesus showim hemseleva long road. And long semtaem wea olketa talem diswan, waswe, iu savve wanem nao happen?

Lukim piksa hia. Jesus showim hemseleva insaed long datfala rum, nomata door hem lok. Olketa disaepol hapi fogud! Diswan hem spesol day, iaman? Waswe, iu savve kaontem haomas taem nao Jesus showim hemseleva long olketa follower bilong hem? Waswe, iu kaont kasem faevfala taem?

Aposol Thomas no stap witim olketa taem Jesus showim hemseleva. So olketa disaepol talem hem: ‘Mifala lukim Lord finis!’ Bat Thomas sei hemseleva mas lukim Jesus bifor hem bilivim datwan. Eitfala day bihaen, taem olketa disaepol stap tugeta long wanfala rum wea lok, Thomas hem stap witim olketa. Seknomoa, Jesus showim hemseleva insaed long datfala rum. Thomas hem biliv nao.